Ի պատասխան հանրության վերսկսված ուշադրության՝ ԱՄՆ նախագահ Դոնալդ Թրամփը խոստացել է հետաքննել տիեզերքի և միջուկային հետազոտությունների հետ կապված տարբեր գիտնականների առեղծվածային անհետացումներն ու մահերը, հայտնում է Fox News-ը։
«Հուսով եմ, որ դա պատահականություն է, բայց մենք այդ մասին կիմանանք մոտակա մեկուկես շաբաթվա ընթացքում,- հինգշաբթի լրագրողներին ասել է Թրամփը։- Ես հենց նոր դուրս եմ եկել այդ հարցով խորհրդակցությունից»։
Բացի այդ, Միջուկային անվտանգության ազգային վարչությունը (NNSA) ավելի վաղ Fox News Digital-ին հայտնել էր, որ ուսումնասիրում է այդ դեպքերը։
Ավելի վաղ հեռուստաալիքը հայտնել էր, որ 2023 թվականից ի վեր ԱՄՆ-ում չպարզված հանգամանքներում անհետ կորել կամ մահացել է տիեզերական հետազոտությունների և միջուկային ֆիզիկայի հետ կապված առնվազն ութ գիտնական։
Ըստ հեռուստաալիքի, նրանց թվում է NASA-ի աշխատակից Մայքլ Հիքսը, որը մահացել է 2023 թվականին 59 տարեկանում։ Նա զբաղվում էր գիսաստղերի և աստղակերպերի հետազոտությամբ, սակայն մահվան պատճառները չեն բացահայտվել։
Հաղորդվում է նաև 2025 թվականին Լոս Ալամոսի ազգային լաբորատորիայի 53-ամյա աշխատակցուհի Մելիսա Կասիասի անհետացման մասին, որն աշխատում էր միջուկային տեխնոլոգիաների ոլորտում։
Ցանկում վերջինը հիշատակվում է ԱՄՆ ռազմաօդային ուժերի նախկին գեներալ-մայոր Ուիլյամ Մաքասլանդը, որն անհետացել է 2026 թվականի փետրվարին։ Ըստ հեռուստաալիքի, նա գաղտնի տեղեկատվության հասանելիություն ուներ։
