Ցանկացած ելք մեզ համար ընկալելի և ընդունելի կլինի. դա մեր վարքագիծը երբեք չի փոխի ։ Այս մասին այսօր՝ ապրիլի 17–ին, դատարանի դիմաց լրագրողների հետ զրույցում նշեց «Ուժեղ Հայաստան» կուսակցության առաջնորդ Սամվել Կարապետյանի եղբայրը՝ Կարեն Կարապետյանը՝ պատասխանելով հարցին, թե արդյոք ակնկալում է, որ Սամվել Կարապետյանի խափանման միջոցն այսօր կփոխվի և նա ազատ կարձակվի։
«Դուք իմ կարծիքով, ավելի լավ գիտեք պատասխանը, քան թե ես»,–ասաց նա։
Դիտարկմանը, որ Նիկոլ Փաշինյանը հայտարարել է, որ մինչև տարեվերջ Սամվել Կարապետյանը կաղքատանա, նա արձագանքեց. «Դուք էլ մի բան ասեք էլի, սուտ է, մի սուտ էլ դուք ասեք»։
Հիշեցնենք, որ տասը ամիս տևած քննությունից հետո ապրիլի 15–ին մեկնարկել է Սամվել Կարապետյանի դատավարությունը՝ մի քանի հոդվածներով՝ հանցավոր ծագում ունեցող միջոցների օրինականացումից մինչև իշխանությունը զավթելուն ուղղված հրապարակային կոչեր:
Առաջին նիստին ընդառաջ Կարապետյանների փաստաբանները միջնորդություն են ներկայացրել դատարան, որպեսզի դատավորը առաջնահերթ քննի Սամվել Կարապետյանին տնային կալանքից ազատելու հարցը:
Փաստաբան Արամ Վարդևանյանը նախօրեին հայտարարել էր. «Ապրիլի 21-ին «Ուժեղ Հայաստան» կուսակցությունը հրավիրել է համագումար և կարևոր է, որ մինչ այդ համագումարը Սամվել Կարապետյանը հնարավորություն ունենա ամբողջությամբ մասնակցելու քաղաքական գործընթացին։ Մրցակցության, հավասարության և ընտրական գործընթացի երաշխիքների տեսանկյունից՝ սա ակնհայտ անհրաժեշտություն է, հույս ունենք, որ դա կապահովվի, և ցավ ենք ապրում, որ այդ բեռը ընկել է դատական իշխանության ուսերին»։
Փաստաբանը հիշեցրել է, որ Կենտրոնական ընտրական հանձնաժողովն արդեն ընդունում է քաղաքական ուժերի հայտերը, կազմում է ցուցակները, և այդ գործընթացը կշարունակվի մինչև ապրիլի 23-ը։
Ապրիլի 15–ի նիստը հետաձգվել էր 2 օրով և կշարունակվի այսօր։
