ՀՀ բարձր տեխնոլոգիական արդյունաբերության նախարար Մխիթար Հայրապետյանն ապրիլի 15-ին ընդունել է Հայաստանի Հանրապետությունում Եգիպտոսի Արաբական Հանրապետության արտակարգ և լիազոր դեսպան Ամալ Աֆիֆիին:
Հանդիպմանը ներկա է եղել նաև ԲՏԱՆ Ռազմարդյունաբերության կոմիտեի նախագահ Արամ Ջիվանյանը։
Կողմերը բարձր են գնահատել երկու երկրների միջև բարեկամական հարաբերությունները՝ ընդգծելով համագործակցության շարունակականությունն ապահովելու և պատմական ամուր կապերը գործնական, փոխշահավետ ծրագրերի վերածելու մեծ ներուժը։
Նախարարը ներկայացրել է ՀՀ կառավարության կողմից բարձր տեխնոլոգիական էկոհամակարգի զարգացմանն ուղղված բազմաբնույթ ծրագրերը, իրականացվող միջոցառումներն ու նախաձեռնությունները: Այս համատեքստում Մխիթար Հայրապետյանն անդրադարձել է «Սիսայդ Ստարտափ Սամմիթ» միջոցառման հաջողված մոդելին, «ԹՈՒՄՈ» ստեղծարար տեխնոլոգիաների կենտրոնի գործունեությանը, ինչպես նաև Հրազդանում «Firebird AI» ընկերության կողմից արհեստական բանականության տվյալային կենտրոնի կառուցման ընթացքին՝ կարևորելով նշված հարթակներում համագործակցության ձևավորման և զարգացման հեռանկարները։
Քննարկվել են նաև գիտական հետազոտությունների և փորձարարական մշակումների (R&D), բարձր տեխնոլոգիական և պաշտպանական արդյունաբերության ոլորտներում համագործակցության ընդլայնման հնարավորությունները։ Անդրադարձ է կատարվել «EDEX 2025» միջազգային ցուցահանդեսի շրջանակում ձեռք բերված պայմանավորվածություններին, ինչպես նաև հունիսի 3-4-ը Հայաստանում նախատեսվող «Research Innovation Science Engineering» (RISE) ցուցահանդեսին եգիպտական կողմի ակտիվ մասնակցության կարևորությանը: Համագործակցության խորացման և փորձի փոխանակման համատեքստում ընդգծվել է նաև փոխադարձ այցելությունների կազմակերպման անհրաժեշտությունը:
Կողմերը վերահաստատել են փոխգործակցության շարունակական զարգացման հանձնառությունը՝ ուղղված երկկողմ օրակարգի խորացմանն ու նոր համատեղ նախաձեռնությունների իրականացմանը։
