Այսօր՝ Ավագ շաբաթ օրը, Սուրբ Զատկի նախօրեին, Երուսաղեմի Սուրբ Հարության տաճարում (Տիրոջ Գերեզմանի տաճար) վառվել է Սրբալույս կրակը։
Սրբալույս կրակի իջնելու արարողությունը տեղի է ունենում տաճարի կենտրոնական հատվածում գտնվող Կուվուկլիա մատուռում։ Մատուռը ծածկում է Տիրոջ Գերեզմանի քարայրը։ Հենց այստեղ է գտնվում քրիստոնյաների համար սրբազան այն սալաքարը, որի տակ եղել է Հիսուս Քրիստոսի գերեզմանը։ Ողջ պատմության ընթացքում ոչ ոքի չի հաջողվել բացահայտել այս կրակի հայտնվելու գաղտնիքը։
Սրբալույս կրակը խորհրդանշում է Քրիստոսի հարության լույսը, և հավատացյալներն այն համարում են մեծագույն սրբություն։
