Կոռուպցիայի գործով Իսրայելի վարչապետ Բենիամին Նեթանյահուի դատավարությունը կվերսկսվի կիրակի օրը՝ պատերազմական շաբաթներ տևած դատական ընդմիջումներից հետո, գրում է The Jerusalem Post-ը։
Ըստ դատարանի ծանուցման՝ հաջորդ նիստը նշանակված է կիրակի օրը՝ տեղական ժամանակով 9:30-ին, Երուսաղեմի շրջանային դատարանում՝ պաշտպանկան կողմի վկայի ցուցմունք տալու համար։
Ծանուցման մեջ նշվում է նաև, որ արտակարգ դրության վերացումից և դատական համակարգի բնականոն գործունեության վերադառնալուց հետո, լսումները կվերսկսվեն սովորականի պես՝ կիրակի օրերին Երուսաղեմում և երկուշաբթիից չորեքշաբթի՝ Թել Ավիվի շրջանային դատարանում։
Դադարը բնորոշ էր ոչ միայն Նեթանյահուի գործին։ Փետրվարի 28-ին պատերազմի սկսվելուց հետո Արդարադատության նախարարությունը դատարանները դրեց «արտակարգ դրության հատուկ ռեժիմի» տակ՝ կտրուկ կրճատելով դատական կանոնավոր դատավարությունները և թույլ տալով քննել միայն անհետաձգելի գործերը։ Այդ ժամկետը մի քանի անգամ երկարաձգվել է, և վերջին պաշտոնական ծանուցման մեջ նշվում էր, որ արտակարգ դրությունը ուժի մեջ կմնա մինչև հինգշաբթի։
Այժմ, երբ այդ ժամանակահատվածն ավարտվում է, Նեթանյահուի դատավարությունը, ինչպես շատ այլ ոչ անհետաձգելի քրեական և քաղաքացիական դատավարություններ, վերադառնում է ժամանակացույցին։
Նեթանյահուին մեղադրանք է առաջադրվել 2019 թվականին և նա իրեն մեղավոր չի ճանաչել՝ հերքելով բոլոր հանցանքները։ Նա սկսել է ցուցմունք տալ 2024 թվականի դեկտեմբերին՝ դառնալով Իսրայելի առաջին գործող վարչապետը, որը ցուցմունք է տվել որպես մեղադրյալ քրեական գործով, իսկ մեղադրանքի կողմը խաչաձև հարցաքննությունը սկսել է 2025 թվականի հունիսին՝ պաշտպանության կողմից մի քանի ամիս տևած անմիջական հարցաքննությունից հետո։
