Քուվեյթի մի շարք ենթակառուցվածքային օբյեկտներ դարձել են իրանական անօդաչու սարքերի հարձակման թիրախ, չորեքշաբթի հաղորդել է երկրի Ներքին գործերի նախարարությունը։
«Չորեքշաբթի լուսաբացից Քուվեյթի նավթային կորպորացիայի և էլեկտրաէներգիայի, ջրի և վերականգնվող էներգիայի նախարարության իրավասության տակ գտնվող մի շարք կարևոր օբյեկտներ ենթարկվել են թշնամական անօդաչու թռչող սարքերի կիրառմամբ Իրանի ինտենսիվ հարձակումների»,- ասվում է նախարարության սոցիալական ցանցերում տարածված հայտարարության մեջ։
Ըստ հայտարարության՝ հարվածները հասցվել են մի քանի օբյեկտների, դրանց թվում՝ նավթային օբյեկտների, երեք էլեկտրակայանների և աղազերծման կայանների, ինչը զգալի վնաս է հասցրել ենթակառուցվածքներին, արտադրող սարքավորումներին, թորման սյուներին և վառելիքի ամբարներին, իսկ մի քանի վայրերում հրդեհներ են բռնկվել։
