Ես վստահ եմ, որ Իրանի մեր եղբայրական, հերոսական ժողովուրդը կդիմակայի ամերիկա-իսրայելական անմարդկային, բարբարոսական քայլերին։ Այս մասին, այսօր՝ ապրիլի 8–ին, ԱԺ–ում լրագրողների հետ զրույցում նշեց ՔՊ–ից հեռացված պատգամավոր Հովիկ Աղազարյանը։
«Եթե Աստված չանի, չդիմակայի, և Իսրայելը հասնի իր նպատակին, իսկ Իսրայելի բուն նպատակը Իրանը մասնատելն է, այդ դեպքում մենք գիտենք ինչ միավորներ են առաջանում, այդ դեպքում չկա Թրամփի ուղի։ Իսկ եթե Իրանի ժողովուրդը դիմակայի, այդ դեպքում նույնպես Թրամփի ուղին կդառնա ոչ արդիական։ Հետևաբար այդ 99 տարվա խաղաղությունը փաստորեն փշրվեց մի քանի օրերի ընթացքում։
Երբ «Թրամփի ուղի» նախագիծը շրջանառության մեջ դրվեց, այնտեղ կար մի վտանգավոր կետ, եթե այդ կետը այդպիսին չլիներ, ապա մենք հանգիստ կարող էինք խոսել և Իրանի ղեկավարության հետ, և Ռուսաստանի հետ, և ուրիշ պետությունների հետ, ցույց տալու համար, որ դա մեր պետության շահերից է բխում։
Այնտեղ կա կետ, որ կողմերը կարող են իրենց մասնաբաժինը տրամադրել, կամ վաճառել, օտարել երրորդ կողմի։ Սա անթույլատրելի կետ է, որովհետև և՛ Իրանի Իսլամական Հանրապետությունը, և՛ Ռուսաստանը, և՛ Վրաստանը, և՛ Մոզամբիկը, գիտեն, թե այդ երրորդ կողմը որն է՝ Ադրբեջան կամ Թուրքիա։ Դա գրեթե հավասարազոր է այն իրավիճակին, որ Թրամփի ուղի մասնակից լինի Թուրքիան, Ադրբեջանը, Ռուսաստանը, Իրանի Իսլամական Հանրապետությունը և Հայաստանը։ Բայց այսօր այդ հարցը արդեն օրակարգում չկա, կարծում եմ»,– ընդգծեց Աղազարյանը։
