ԱՄՆ նախագահ Դոնալդ Թրամփը ծաղրել է Ֆրանսիայի նախագահին՝ խստորեն քննադատելով ՆԱՏՕ-ի դաշնակիցներին Մերձավոր Արևելքը ցնցած Իրանի դեմ պատերազմին չմիանալու համար։
«Ես զանգում եմ Ֆրանսիա՝ Մակրոնին, ում հետ կինը շատ վատ է վարվում։ Նա դեռ ուշքի է գալիս ծնոտին հասցված հարվածից», — ասել է Թրամփը։
Նա նկատի է ունեցել 2025 թվականի մայիսի մի տեսանյութ, որտեղ թվում էր, թե Բրիջիտ Մակրոնը Վիետնամ կատարած այցի ժամանակ հարվածում է Ֆրանսիայի նախագահի դեմքին։ Մակրոնը հերքել է դա՝ անվանելով ապատեղեկատվություն։
«Ես ասացի. Էմանուել, մենք շատ ուրախ կլինեինք օգնություն ստանալ Պարսից ծոցում, չնայած նրան, որ մենք վատ մարդկանց ու բալիստիկ հրթիռների ոչնչացման ռեկորդներ ենք սահմանում։ Մենք շատ ուրախ կլինեինք օգնություն ստանալ։ Եթե հնարավոր է, չե՞ք կարող անմիջապես նավեր ուղարկել», — շարունակել է Թրամփը։
Այնուհետև նա, ֆրանսիական առոգանություն կրկնօրինակելով, հնչեցրել է Մակրոնի ենթադրյալ պատասխանը. «Ո՛չ, ո՛չ, ո՛չ, մենք չենք կարող դա անել, Դոնալդ։ Մենք կկարողանանք դա անել պատերազմում հաղթելուց հետո», — ասել է նա։
«Ես ասացի. «Ո՛չ, ո՛չ, պատերազմում հաղթելուց հետո Էմանուելն ինձ պետք չէ»», — հայտարարել է Թրամփը։
Նա նաև ՆԱՏՕ-ն անվանել է «թղթե վագր», ինչը Թրամփի և նրա բարձրաստիճան պաշտոնյաների հերթական հարձակումն է եղել անդրատլանտյան դաշինքի դեմ (անցյալ տարի Սպիտակ տուն վերադարձից ի վեր):
