Լոնդոնի «Տոտենհեմը» պաշտոնապես հայտարարել է Ռոբերտո Դե Ձերբիին թիմի գլխավոր մարզչի պաշտոնում նշանակելու մասին։
Ակումբի մամուլի ծառայությունն ընդգծում է, որ իտալացի մասնագետի հետ կնքվել է երկարաժամկետ պայմանագիր։ Ավելի վաղ մամուլում շրջանառվող լուրերի համաձայն՝ 46-ամյա մարզչի հետ աշխատանքային համաձայնագիրը նախատեսված է հինգ տարվա համար։
Դե Ձերբին Անգլիայի Պրեմիեր լիգայում աշխատելու փորձ արդեն ունի. նախկինում նա հաջողությամբ գլխավորել է «Բրայթոնը»։ Մասնագետի վերջին աշխատավայրը ֆրանսիական «Մարսելն» էր, որտեղից նա հեռացել է 2026 թվականի փետրվարին։ Իր մարզչական կարիերայի ընթացքում իտալացին հասցրել է աշխատել նաև Դոնեցկի «Շախտյորի», ինչպես նաև իտալական «Սասուոլոյի», «Բենևենտոյի» և «Պալերմոյի» հետ։
Հիշեցնենք, որ մարտի 29-ին «Տոտենհեմը» պաշտոնանկ էր արել Իգոր Տուդորին, ով թիմի ղեկը ստանձնել էր ընթացիկ տարվա փետրվարի 14-ին։ 2025/2026 մրցաշրջանի ընթացքում Տուդորն արդեն երրորդ գլխավոր մարզիչն էր. մինչ այդ լոնդոնյան ակումբը հասցրել էր հրաժեշտ տալ դանիացի Թոմաս Ֆրանկին և ավստրալացի Անգելոս Պոստեկոգլուին։
