Կրասնոդարում ավարտվում է Դոնի Ռոստովի Սովետսկի շրջանային դատարանի նախկին նախագահ Ելենա Կոբլևայի գործով դատավարությունը։ Նա մեղադրվում է որսագողության երկու նավակ և ուռկան վերադարձնելու դիմաց 500 հազար ռուբլի կաշառք ստանալու մեջ, հայտնում է «Коммерсантъ»-ը։
Մեղադրողն առաջարկել է նախկին դատավորին դատապարտել տասը տարվա ազատազրկման, կաշառք տվողին և միջնորդին՝ համապատասխանաբար ինը և յոթ տարվա ուղղիչ գաղութի, ինչպես նաև յուրաքանչյուրին տուգանել 15 միլիոն ռուբլով։
Նախկին դատավոր Ելենա Կոբլևան մեղադրվում է խոշոր չափի կաշառք ստանալու (ՌԴ ՔՕ 290-րդ հոդվածի 5-րդ մաս), «Զեմլյա Դոնա» ձկնորսական արտելի բրիգադիր Վլադիմիր Բոժենկոն՝ կաշառք տալու (ՌԴ ՔՕ 291-րդ հոդվածի 4-րդ մաս), իսկ գործարար Նիկոլայ Ստուդենիկինը՝ միջնորդության համար (ՌԴ ՔՕ 291.1 հոդվածի 3-րդ մաս):
Ըստ քննության վարկածի, 2022 թվականի դեկտեմբերին դատավոր Ելենա Կոբլևան 500 հազար ռուբլի է ստացել Վլադիմիր Բոժենկոյից առգրավված նավակների և ուռկանի բռնագանձման մասին դատական ակտը չեղարկելու դիմաց։ Դրանք առգրավվել էին որսագողության գործի քննության շրջանակում։
Ամբաստանյալներ Կոբլևայի և Բոժենկոյի պաշտպանները, ինչպես նաև հենց իրենք՝ մեղադրյալները, պնդել են, որ կաշառք ստանալու և տալու մեղքը ապացուցված չէ։ Ամբաստանյալները վկայակոչել են այն դատավորների գործընթացին միջամտության բացակայությունը, որոնք որոշում էին կայացրել նավակների վերաբերյալ։ Նիկոլայ Ստուդենիկինն ընդունել է մեղքը և խնդրել մեղմացնել պատիժը։
Մեղադրական դատավճռի դեպքում Ելենա Կոբլևան կմնա քննչական մեկուսարանում՝ մեկ այլ գործի քննության համար, որում առկա է կաշառակերության ինը դրվագ, ինչպես նաև ակնհայտ անարդար դատական ակտեր կայացնելու և արդարադատությանը խոչընդոտելու կասկածներ։
