Հայաստանի և Ադրբեջանի էներգահամակարգերի միացումը փաստացի կնշանակի «լույսի ռուբիլնիկը» հանձնել Բաքվին։ Այս մասին հունվարի 22-ին Ազգային ժողովի ավանդական ճեպազրույցների ժամանակ հայտարարել է ընդդիմադիր պատգամավոր, ՀՀԿ անդամ Հայկ Մամիջանյանը։
Ավելի վաղ ՀՀ վարչապետ Նիկոլ Փաշինյանը, մեկնաբանելով TRIPP նախագիծը, հայտարարել էր, որ Հայաստանի և Ադրբեջանի էներգետիկ համակարգերը կմիացվեն։
Մամիջանյանի խոսքով՝ նման քայլը լուրջ սպառնալիք է ներկայացնում երկրի էներգետիկ անվտանգության համար։ Այս առումով նա քննադատել է նախաձեռնության տրամաբանությունը։ «Կարո՞ղ է ասի՝ օպտիմալ ծախսերը կազմակերպելու համար եկեք Հայաստանի ու Ադրբեջանի Զինված ուժերը միացնենք իրար, մոտ նույն տրամաբանությունն է։ Սիրելի՛ քաղաքացիներ, օկե՞յ եք, որ մեր էներգետիկ համակարգի՝ լույսի ռուբիլնիկը տանք Ադրբեջանին», — հարցրել է ընդդիմադիր գործիչը։
