ԱՄՆ նախագահ Դոնալդ Թրամփը Ճապոնիայի վարչապետ Սանաե Տակաիտիին ուրբաթ օրվա հեռախոսազրույցի ժամանակ հրավիրել է այցելել Միացյալ Նահանգներ այս տարի, տեղեկացրել է Ճապոնիայի արտաքին գործերի նախարարությունը, փոխանցել է Associated Press-ը։
Դա կլինի ուլտրապահպանողական առաջնորդի առաջին այցը Միացյալ Նահանգներ հոկտեմբերին պաշտոնը ստանձնելուց հետո։ Սպիտակ տունը դեռեւս չի հաստատել զանգը կամ հրավերը։ Դա տեղի է ունեցել Ճապոնիայի եւ Չինաստանի միջեւ հարաբերությունների վատթարացման ֆոնին, ինչը հանգեցրել է լարվածության աճի տարածաշրջանում։
Ճապոնիայի մերձավոր դաշնակից Միացյալ Նահանգները ձգտում է ամրապնդել կապերը Տոկիոյի եւ կայունացնել հարաբերությունները Պեկինի հետ՝ ապրիլին Թրամփի Չինաստան կատարելիք հավանական այցից առաջ։
Ճապոնիայի արտաքին գործերի նախարարության հայտարարության մեջ ասվում է, որ Տակաիտին եւ Թրամփը համաձայնել են համակարգել այցը, որը տեղի կունենա այս գարնանը։
Ճապոնական Kyodo News լրատվական գործակալությունը ենթադրել է, որ Տակաիտիի այցը կարող է համընկնել Վաշինգտոնում կայանալիք սակուրայի ծաղկելու ամենամյա փառատոնի հետ։ Արտաքին գործերի նախարարությունը հայտնել է, որ երկու առաջնորդները հաստատել են, որ «կբացեն նոր գլուխ Ճապոնիա-ԱՄՆ դաշինքի պատմության մեջ» այն տարում, երբ ԱՄՆ-ը նշում է հիմնադրման 250-ամյակը, եւ որ նրանք «կխորացնեն բարեկամական հարաբերությունները» երկու երկրների միջեւ, այդ թվում՝ տնտեսական եւ անվտանգության համագործակցության ոլորտում։
Տակաիտին եւ Թրամփը նաեւ համաձայնության են եկել համախոհ գործընկերների միջեւ համագործակցությունը զարգացնելու իրենց հանձնառության շուրջ, ներառյալ Ճապոնիա-ԱՄՆ-Հարավային Կորեա գործընկերությունը, ինչպես նաեւ ազատ եւ բաց Հնդկա-խաղաղօվկիանոսյան տարածաշրջանը, նշվել է արտաքին գործերի նախարարության հայտարարության մեջ։
Երկու առաջնորդները մտքեր են փոխանակել «հիմնականում Հնդկա-խաղաղօվկիանոսյան տարածաշրջանի վերաբերյալ», տեղեկացրել է նախարարությունը։
