Հայաստանի ժողովուրդը «կանաչ լույս» է տվել խաղաղության գործընթացին։ Այս մասին դեկտեմբերի 3-ին կառավարության ժամի ընթացքում հայտարարել է վարչապետ Նիկոլ Փաշինյանը։
Պատասխանելով պատգամավոր Ծովինար Վարդանյանի հարցին՝ պարզաբանելու համար, թե ինչ նկատի ուներ Փաշինյանը այսօր առավոտյան՝ խոսելով Հայաստանը թակարդից դուրս բերելու մասին, վարչապետը նշել է, որ բանակցությունների վերաբերյալ փաստաթղթերի փաթեթը վերլուծելուց հետո պարզ է դառնում, որ ամբողջ գործընթացը երբեք, ոչ մի վայրկյան, չի եղել Լեռնային Ղարաբաղի հակամարտության լուծման մասին։ Նպատակը եղել է Հայաստանը և որոշ չափով նաև Ադրբեջանին, թակարդում պահելը։ Փաշինյանի խոսքով՝ նպատակը երբեք չի եղել Լեռնային Ղարաբաղի հարցի լուծումը, այլ Հայաստանին զրկել անկախ հանրապետություն դառնալու հնարավորությունից։ Ամբողջ սերնդի կյանք է վտանգված և մենք չենք կարող առաջ շարժվել՝ առանց դա ճանաչելու, կարծում է Փաշինյանը։
«Երբ ես ասում եմ, որ աշխարհաքաղաքական թակարդից դուրս ենք եկել՝ ես դրա մասին էլ եմ խոսել։ Այդ փաթեթը, որ հրապարակվել է խնդրեմ կարդացեք։ Թե ինչպես էր արգելակվում Հայաստանը և ոչ միայն Հայաստան, ավելի լայն ձևակերպմամբ՝ տարածաշրջանը՝ կայանալու որպես ինքնիշխան, բարեկեցիկ տարածաշրջան։ Երբ ես ասում եմ դուրս է եկել աշխարհաքաղաքական թակարդից՝ ես նկատի ունեմ հաստատված խաղաղությունը։ Եվ «մտահոգություններն», որոնք հնչում են կամ բուռն «հայրենասիրական դիտանկյունով հնչող ձևակերպումները» դրանք բոլորովին ուրիշ բանի մասին են՝ դրանք Հայաստանը թակարդի մեջ վերադարձնելու մասին են․ ուրիշ որևէ բանի մասին չեն։ Մենք այսօր պետություն ենք, քան երբևէ, ինքնիշխան ենք, քան երբևէ, անկախ ենք, քան երբևէ։ Հայաստանը այսօր ապրում է իր վերջին 500 տարվա պատմության ամենահեռանկարային և ամենախոստումնալից շրջանը։ Մենք նախորդող շրջանում երբեք ժամանակաշրջան չենք ունեցել, որ ապագայի նկատմամբ ունենանք վստահության այսքան կշիռ», — վստահեցրել է Փաշինյանը։
Երբ պատգամավորը ցանկացել է ճշտել, թե սա՞ էր թիմի նպատակը, Փաշինյանը հաստատել է այդ միտքը՝ հավելելով, որ ինքը նշում է, որ չնայած չգիտի՝ դա լավ բան է, թե ոչ, դա պլանավորված ռազմավարություն չի եղել։ «Մենք մի քիչ ինտուիտիվ ենք գործել, չնայած ինտուիցիան պետք չէ թերագնահատել», — շարունակել է վարչապետը։
Նա պարզաբանել է, որ սկզբում ասել է կառավարություն, հետո քաղաքական մեծամասնություն, թեև իրականում խոսքը ժողովրդի մասին է։ Նրա խոսքով՝ այլապես իշխող ուժը ինչպե՞ս կմնար իշխանության ղեկին։ Փաշինյանի կարծիքով, ժողովուրդը առաջնորդվել է ինտուիցիայով՝ զգալով, որ տեղի ունեցողը համահունչ է իր ներքին զարկերակին։ Այսինքն, ներկայիս իրավիճակը ժողովրդի և քաղաքական մեծամասնության համատեղ արդյունքն է և ժողովուրդը համահեղինակ է՝ կանաչ լույս տալով մեր աշխատանքին այն ժամանակ, երբ դա անհնար էր թվում, հայտարարել է վարչապետը։ «Միայն ժողովրդի ներքին զարկերակն է թույլ տվել շարժվել այս ճանապարհով, որքան էլ բարդ լիներ այն։ Այսօր մենք կարող ենք ասել, որ ճանապարհի ճշմարտացիությունը ապացուցված է», — հայտարարել է Փաշինյանը՝ հավելելով, որ ինչպես արդեն բազմիցս ասել է, Լեռնային Ղարաբաղի հարցը լուծվել է 1996 թ., պարզապես ոչ ոք մեզ այդ մասին չէր ասել։
