Բուքինգհեմյան պալատի ներքին աղբյուրները ցնցված էին արքայազն Հարրիի և Մեգան Մարքլի ներկայությամբ Քրիս Ջենների 70-ամյակի երեկույթին և կարծում են, որ դա ևս մեկ անգամ ապացուցում է, որ զույգը չպետք է վերադառնա թագավորական ընտանիք, հաղորդում է Page Six-ը։
«Դա այնքան անճաշակ է», — ասել է պալատի մի աղբյուր, որը աշխատում է թագավորական ընտանիքի հետ։
Սասեքսի դուքսն ու դքսուհին երեկոյան սև զգեստներ էին հագել և միացել են Հոլիվուդյան աստղերին միլիարդատեր Ջեֆ Բեզոսի և նրա կնոջ՝ Լորեն Սանչեսի կողմից շաբաթ երեկոյան Բևեռլի Հիլզի իրենց 165 միլիոն դոլար արժողությամբ առանձնատանը կազմակերպված երեկույթին։
Հյուրերի թվում էին Բիյոնսեն և Ջեյ Զին, Մարթա Ստյուարտը, Մրայա Քերին, Օփրա Ուինֆրին, Փարիզ Հիլթոնը, Ադելը և ամբողջ Քարդաշյան ընտանիքը։ «Դա իսկապես ցույց է տալիս, որ Հարրին լիովին կտրված է ընտանիքի մնացած անդամներից։ Այս մարդիկ կարող են աստղեր լինել Ամերիկայում, բայց նրանց ցուցադրական շքեղությունը հակասում է այն բանին, ինչ փորձում է անել արքայազն Ուիլյամը», — հավելել է աղբյուրը։
Հյուրերի թվում էր նաև Մարկ Ցուկերբերգը, որի հետ Հարրին և Մեգանը լարված հարաբերություններ ունեն։ Հունվարին զույգը քննադատել է միլիարդատիրոջը «գլոբալ հոգեկան առողջության ճգնաժամին նպաստելու» համար, այն բանից հետո, երբ Մետան վերացրեց փաստերի ստուգումը և խոսքի ազատության սահմանափակումները։ Ցուկերբերգի կողմից Facebook-ի՝ խոսքի ազատության իր սկզբնական քաղաքականությանը վերադառնալու մասին հայտարարությունից մեկ շաբաթ անց, Հարրին և Մեգանը հայտարարություն հրապարակեցին Archewell Foundation կայքում՝ մտահոգություն հայտնելով «ատելության խոսքի նորմալացման» վերաբերյալ։
Զույգի երեկույթին հայտնվելը նաև ընդգծում է նրանց սերտ ինտեգրումը Հոլիվուդին. Բեզոսի ընկերությունը՝ Amazon MGM-ը, թողարկում է Մեգանի Close Personal Friends ֆիլմը, որտեղ նա կխաղա էպիզոդիկ դեր։ Աղբյուրները նշել են, որ սա չի նշանակում, որ Մարքլը լիովին վերադառնում է դերասանական գործունեությանը։
