Նախագահական բանաձևի նախագիծը, որը նախատեսում է թուրք զինվորների մասնակցությունը «Գազայի ուժային ստորաբաժանումներին», փորձագիտական գնահատականների ավարտից հետո կներկայացվի Թուրքիայի խորհրդարան, հայտնում է TRT Haber-ը։
«Արդարություն և զարգացում» խմբակցության նախագահ Աբդուլլա Գյուլերը հայտարարել է, որ Արտաքին գործերի նախարարությունը, Ազգային պաշտպանության նախարարությունը և Ազգային հետախուզական ծառայությունն արդեն աշխատում են մանրամասների վրա։
Նա նշել է, որ նախապես կպատրաստվեն շրջանակն ու պայմանները, օրինակ՝ բանաձևի գործողության տևողությունը, դրա լիազորությունների առանձնահատկությունները և Գազայի իրավիճակի մանրամասները։
Գյուլերը հավելել է, որ այս ամիս խորհրդարանին կներկայացվեն այլ բանաձևեր (Սիրիա-Իրաքի, Լիբանանի, Կենտրոնական Աֆրիկայի և Մալիի վերաբերյալ), որոնց գործողության ժամկետը լրանում է։ Այն բանից հետո, երբ բոլոր գերատեսչություններն ավարտեն իրենց վերլուծությունները, փաստաթուղթը կուղարկվի խորհրդարանի ղեկավարությանը։
Ավելին, Գյուլերը շեշտեց, որ Թուրքիան «մնում է պաղեստինյան ժողովրդի կողքին» և այս ուղղությամբ անհրաժեշտ բոլոր նախաձեռնությունները կներկայացվեն խորհրդարան։
