ԱՄՆ նախագահ Դոնալդ Թրամփը ամերիկյան հակաֆաշիստական «Անտիֆա» շարժումը որակել է որպես «ահաբեկչական կազմակերպություն»։ Նա այդ մասին հայտարարել է իր TruthSocial սոցիալական ցանցի էջում։ Սպիտակ տան ղեկավարը շարժումն անվանել է «հիվանդ, վտանգավոր, արմատական ձախակողմյան աղետ»։ «Ես նաև խստորեն խորհուրդ եմ տալիս մանրակրկիտ հետաքննություն անցկացնել «Անտիֆային» ֆինանսավորողների վերաբերյալ՝ համաձայն բարձրագույն իրավական չափանիշների և պրակտիկայի», — գրել է ամերիկացի նախագահը։
Reuters-ը հիշեցնում է, որ Թրամփը դեռ իր նախագահության առաջին շրջանում էր խոսում հակաֆաշիստական շարժումը ահաբեկչական կազմակերպություն ճանաչելու մտադրության մասին։ Նա նման հայտարարություններ էր անում Մինեսոտա նահանգի Մինեապոլիս քաղաքում աֆրոամերիկացի Ջորջ Ֆլոյդի մահվանից հետո տեղի ունեցած զանգվածային բողոքի ցույցերի և Օրեգոն նահանգի Փորթլենդ քաղաքում ծայրահեղական աջերի և հակաֆաշիստների մասնակցությամբ նախապատրաստվող ակցիաների ֆոնին։ Թրամփն այս գաղափարին վերադարձել է իր համախոհի՝ աջ արմատական ակտիվիստ Չարլի Քիրքի սպանությունից հետո։ Սեպտեմբերի 10-ին Յուտա Վելի համալսարանի ուսանողների առջև ելույթի ժամանակ 31-ամյա քաղաքական գործիչը հրազենային վնասվածք էր ստացել պարանոցի հատվածում և քիչ անց մահացել։ Հրացանի փամփուշտի պարկուճի վրա, որոնցով, ենթադրաբար, սպանվել էր Քիրքը, հայտնաբերվել էին հակաֆաշիստական կարգախոսներ։ Մասնավորապես, մակագրություններից մեկը հետևյալն էր. «Հե՜յ, ֆաշիստներ, բռնեք սա»։
