Թուրքիայի խորհրդարանը միաձայն ընդունել է բանաձև, որով կոչ է անում կասեցնել Իսրայելի անդամակցությունը Միավորված ազգերի կազմակերպությանը և այլ միջազգային կազմակերպություններին Գազայի հատվածում նրա քաղաքականության պատճառով: Օրենսդիր մարմինը միաժամանակ աշխարհի խորհրդարաններին կոչ է արել դադարեցնել Իսրայելի հետ ռազմական և առևտրային հարաբերությունները, հաղորդում է ТАСС-ը:
«Կոչ ենք անում կասեցնել Իսրայելի անդամակցությունը ՄԱԿ-ին և միջազգային կազմակերպություններին, մինչև նրա կառավարությունը չհրաժարվի իր ցեղասպանության քաղաքականությունից: Բոլոր երկրների ազգային խորհրդարաններին կոչ ենք անում դադարեցնել Իսրայելի հետ ռազմական և առևտրային կապերը և անհապաղ գործել Պաղեստինի նկատմամբ էմբարգոն վերացնելու համար»,-ասված է Խորհրդարանի խոսնակ Նուման Քուրթուլմուշի ստորագրած փաստաթղթում:
Թուրքիայի խորհրդարանը միաժամանակ դատապարտել է Պաղեստինի երկարատև բռնազավթումը և միջազգային հանրությանը կոչ է արել մեծացնել ճնշումն Իսրայելի վրա՝ անհապաղ հրադադարի, զորքերի դուրսբերման և Գազային անխափան մարդասիրական օգնության հասնելու համար:
