Ինտելեկտը շատ կարևոր գործիք է յուրաքանչյուր պայքարի մեջ, իհարկե արժանապատիվ մարդիկ միավորվելու հատկություն ունեն և նրանք կմիավորվեն, բայց մեզ բոլորիս պետք է առաջնորդի ինտելեկտը։ Այս մասին, այսօր՝ օգոստոսի 29–ին, Սամվել Կարապետյանի հիմնադրած «Մեր ձևով» շարժման մեկնարկին նվիրված միջոցառման ժամանակ նշեց շարժման համակարգող խորհրդի գլխավոր պատասխանատու, «Տաշիր գրուպ» ընկերությունների խմբի փոխնախագահ Նարեկ Կարապետյանը՝ անդրադառնալով նրան, թե ովքե՞ր են լինելու Սամվել Կարապետյանի կողմից ստեղծվելիք նոր քաղաքական ուժի կազմում։
«Ինչ վերաբերվում է տարբեր քաղաքական գործիչների շարժմանը միանալ–չմիանալուն, կուզեի ասել, որ մեր հասարակության մեծ մասը գաղափարական առումով չի տեսնում այս պահին որևէ ուժ, ում կարող է իր հայացքն ուղղել։ Շատ քաղաքական, նաև ոչ քաղաքական գործիչներ չեն տեսնում ուժ, որին իրենց հայացքները կարող են ուղղել։ Այդ իսկ պատճառով նրանք կարող են ուղղել նոր ուժի, որը ճիշտ ինտելեկտուալ և իրագործելի նպատակներ է առաջարկում։
Չնայած ֆինանսական բոլոր ռեսուրսներին, պետությունն էլ ունի լավ ֆինանսական ռեսուրսներ, սակայն շատ պրոֆեսիոնալներ դուրս են գալիս պետական ապարատից։ Ֆինանսական ռեսուրսը վերջնական ճշմարտություն չէ, և պետական ապարատում մասնագետների սակավությունը հենց ապացուցում է, որ ֆինանսները միակ պատճառը չեն, այլ նաև գաղափարական տուպիկները, որը տարբեր պրոֆեսիոնալների ստիպում է դուրս գալ համակարգից»։
Հարցին՝ արդյոք նախկին վարչապետ Կարեն Կարապետյանը կմիանա՞ իրենց թիմին, թե՞ որոշել է անցավ գլուխը ցավի տակ չդնել, Նարեկ Կարապետյանը պատասխանեց. «Քաղաքական անձանց ներգրավվածությունը կհայտարարվի, երբ որ արդեն չորս-հինգ ամիս հետո մենք հանդես գանք կուսակցական գործունեության մասին հայտարարությամբ»։
