Իրանի արտգործնախարար Աբբաս Արաղչին, Եվրոպական եռյակի՝ Ֆրանսիայի, Մեծ Բրիտանիայի և Գերմանիայի ԱԳ նախարարները և Եվրոպական դիվանագիտության ղեկավար Կայա Կալասը հեռախոսազրույց են ունեցել:
Կողմերը պայմանավորվել են հաջորդ շաբաթ վերսկսել Իրանի միջուկային ծրագրի շուրջ բանակցությունները: Քննարկումները տեղի կունենան օգոստոսի 26-ին, արտաքին գործերի փոխնախարարների մակարդակով:
Ըստ Արաղչիի, Իրանը բաց է իր իրավունքները երաշխավորող դիվանագիտական լուծման համար։ Եվրոպական 3 երկիր ավելի վաղ հայտարարարել էր, որ կարող են վերականգնել Իրանի դեմ ՄԱԿ-ի պատժամիջոցները, եթե Թեհրանը չվերադառնա բանակցությունների սեղանի շուրջ:
«Եվրոպական երկրներն իրավական և բարոյական հիմքեր չունեն պատժամիջոցների վերականգնման մեխանիզմի գործարկման համար, այդ քայլը հետևանքներ կունենա»,- ասել է նա:
Խոսելով 2231 բանաձևը երկարաձգելու առաջարկի մասին, Արաղչին նշել է, որ նման որոշում առաջին հերթին պետք է կայացնի ՄԱԿ-ի Անվտանգության խորհուրդը` հավելելով, որ Իսլամական Հանրապետությունը, չնայած այդ հարցում իր սկզբունքային դիրքորոշմանը, չի միջամտի այդ գործընթացին։
