Ինդոնեզիայի իշխանությունները 800 տոննա մարդասիրական օգնություն կուղարկեն՝ աղետալի վիճակում հայտնված պաղեստինցի ժողովրդին աջակցելու համար։ Այդ մասին հայտնել է Ինդոնեզիայի օգնության ազգային գործակալության ղեկավար Նուր Ահմադը։
«Մենք պատրաստել ենք 800 տոննա օգնություն, որը օդային ճանապարհով կմատակարարվի Ինդոնեզիայի ազգային զինված ուժերի կողմից՝ Հորդանանի և Եգիպտոսի ռազմաօդային ուժերի հետ համագործակցությամբ», — նրա խոսքերը մեջբերում է Antara լրատվական գործակալությունը։ Ինչպես նշել է գերատեսչության ղեկավարը՝ 80 տոննա քաշով բեռի առաջին խմբաքանակը պաղեստինցի ժողովրդին կփոխանցվի օգոստոսի 17-ին, իսկ մնացած մասը կմատակարարվի ավելի ուշ։
Օգոստոսի 7-ին Ինդոնեզիայի նախագահի մամուլի քարտուղար Հասան Նասբին հայտարարել է, որ ասիական երկրի իշխանությունները պատրաստ են խաղաղապահ ուժեր ուղարկել և մարդասիրական օգնություն հասցնել Գազայի հատված։ Նրա խոսքով՝ Ինդոնեզիայի առաջնորդ Պրաբովո Սուբիանտոն պաշտպանության նախարարությանը հանձնարարել է պատրաստել երկու Hercules տրանսպորտային ինքնաթիռ՝ մարդասիրական օգնություն տեղ հասցնելու համար։
