ԱՄՆ նախագահ Դոնալդ Թրամփը հայտարարել է, որ Ազգային գվարդիայի 800 զինվոր կուղարկի Վաշինգտոն և մայրաքաղաքի ոստիկանությունը կվերցնի դաշնային վերահսկողության տակ։ Նա սպառնացել է, որ անհրաժեշտության դեպքում այնտեղ կմտցնի նաև գործող զորքեր, ինչպես նաև կարող է նույն միջոցները կիրառել նաև այլ խոշոր քաղաքներում, գրում է The Wall Street Journal-ը։
Քաղաքական գործիչը Վաշինգտոնում սպանությունների մակարդակը համեմատել է աշխարհի այլ մայրաքաղաքների, այդ թվում՝ Բաղդադի և Բոգոտայի հետ, թեև ընդունել է, որ վերջին մեկ տարում ԱՄՆ մայրաքաղաքում բռնության մակարդակը նվազել է 35%-ով, ինչը վերջին 30 տարվա ամենացածր ցուցանիշն է։ Չնայած դրան, նա հայտարարել է, որ Վաշինգտոնի բնակիչներն իրենց ապահով չեն զգում փողոցներում և խոստացել է «ազատվել հետնախորշերից»։
Վերջին օրերին Թրամփը կտրուկ քննադատել է Վաշինգտոնի քաղաքապետ Մյուրիել Բոուզերին՝ մեղադրելով նրան հանցագործությունների և անօթևանության դեմ պայքարի անբավարար ջանքերի համար, ինչպես նաև ավելացրել է դաշնային իրավապահների ներկայությունը քաղաքում։ Աղբյուրի փոխանցմամբ՝ պարեկություն իրականացնելու համար ուղարկվել են հարյուրավոր դաշնային գործակալներ, այդ թվում՝ ՀԴԲ-ի ավելի քան 100 աշխատակից։
Թրամփը որպես օրինակ բերել է Կառավարության աշխատանքի արդյունավետության բարձրացման դեպարտամենտի աշխատակից Էդվարդ Կորիստինի դեպքը, ում ծեծել էին մեքենան առևանգելու փորձի ժամանակ։ Նա հրապարակել է տուժածի լուսանկարը և նախազգուշացրել, որ եթե քաղաքում իրավիճակը չփոխվի, ապա այն դաշնային կառավարման ներքո վերցնելը անխուսափելի կդառնա։
Իրավիճակի առանձնահատկությունն այն է, որ Կոլումբիա շրջանը, որտեղ գտնվում է Վաշինգտոնը, չի կառավարում իր Ազգային գվարդիան, ուստի ԱՄՆ նախագահը լայն լիազորություններ ունի այն տեղակայելու համար։
Սպիտակ տունը Կոնգրեսին տեղեկացրել է շրջանի ոստիկանությունը վերահսկողության տակ վերցնելու իր ծրագրերի մասին։ Գլխավոր դատախազ Փեմ Բոնդին կհսկի գործընթացը, իսկ ոստիկանության ժամանակավոր դաշնային հանձնակատար է նշանակվել Թերրի Քոուլը՝ Թմրամիջոցների դեմ պայքարի վարչության ադմինիստրատորը։
Թրամփը նաև նախատեսում է դիմել Կոնգրեսին՝ առաջարկելով չեղարկել դրամական գրավները, որոնք, ըստ նրա, նպաստում են հանցագործությունների աճին։ Որոշ նահանգներ և Վաշինգտոնն արդեն սահմանափակել կամ չեղարկել են դրամական գրավի կիրառումը՝ քրեական արդարադատության համակարգն ավելի արդար դարձնելու նպատակով։
Դեմոկրատները քննադատել են Թրամփի գործողությունները՝ այն անվանելով «աբսուրդի թատրոն» և կոչ են արել փոխարենը աշխատել հանցագործության դեմ պայքարի արդյունավետ ծրագրերի վրա։
