Հայաստանում իշխող «Քաղաքացիական պայմանագիր» խմբակցությունը օրակարգից չի հանում Ամենայն հայոց կաթողիկոս Գարեգին Բ-ի հրաժարականի հարցը։
Կառավարության նիստից հետո կայացած ճեպազրույցի ժամանակ լրագրողները «ՔՊ»-ի ներկայացուցիչ էկոնոմիկայի նախարար Գևորգ Պապոյանից հարցրել են, թե արդյոք հարցը հանվել է օրակարգից՝ հաշվի առնելով, որ այդ թեմայի շուրջ խոսակցությունները մարել են։
Նախարարը վստահեցրել է, որ իշխող կուսակցության օրակարգից ոչինչ չի հանվել։ «Անհնար է լինել Հայ առաքելական եկեղեցու հետևորդ և հաշտվել այն մտքի հետ, որ ամբողջ վերնախավը կամ դրա մեծ մասը խնդիրներ ունի կուսակրոնության երդման հետ», — ասել է Պապոյանը։
Հիշեցնենք, որ ամուրիության ուխտի խախտումը քրեորեն պատժելի արարք չէ, հետևաբար, հոգևորականների անձնական կյանքի մասին փաստերի պարզումը մտքեր է առաջացնում պետական ռեսուրսների ոչ նպատակային օգտագործման և անձնական կյանքին միջամտության մասին։
