Երևանի տեղական ինքնակառավարման մասին նոր օրենքի նախագիծն իր կարևորությամբ անառարկելի է՝ որպես իրավական հիմք, որը կձևավորի մայրաքաղաքի կառավարման ապագա կառուցվածքը։ Մենք՝ քաղաքացիական հասարակության մի շարք կազմակերպություններ, մանրակրկիտ ուսումնասիրել ենք նախագծի բովանդակությունն ու դրույթները՝ արձանագրելով մի շարք խնդրահարույց կետեր, որոնք կարող են բացասաբար ազդել Երևանի կառավարման արդյունավետության, թափանցիկության և հաշվետվողականության վրա՝ միաժամանակ մեծացնելով անձնական հայեցողության և կոռուպցիոն ռիսկերի հավանականությունը։
Նախագծի վերլուծության արդյունքում ներկայացվել են մի շարք առաջարկություններ, որոնք միտված են՝
Երևանի քաղաքապետի լիազորությունների հստակեցմանը,
կոռուպցիոն ռիսկերի նվազեցմանը,
հանրային մասնակցության, թափանցիկության և հաշվետվողականության ամրապնդմանը,
բարեվարքության և էթիկայի սկզբունքների ներառմանը։
Մենք կարևորում ենք օրենքի նախագծի իրական, ընդգրկուն և ողջամիտ ժամկետներում անցկացվող հանրային քննարկման անցկացումը՝ ապահովելով շահագրգիռ բոլոր կողմերի մասնակցությունը։
Առաջարկությունների փաթեթում շեշտադրվում է նաև արդարադատության նախարարության կողմից մշակված կարգավորումների ներառման անհրաժեշտությունը՝ որպես հավասարակշռված և ժողովրդավարական կառավարման համակարգի հիմք։ Այդպիսի համակարգը պետք է գործի ոչ թե մեկ անձի կամ միանձնյա իշխանության հայեցողությամբ, այլ հիմնված լինի քաղաքացիների մասնակցության, թափանցիկության և հաշվետվողականության սկզբունքների վրա։
Առաջարկների ամբողջական փաթեթը հասանելի է Թրանսփարենսի Ինթերնեշնլ հակակոռուպցիոն կենտրոնի կայքում։
Ներկայացված առաջարկությունները մշակվել են Թրանսփարենսի Ինթերնեշնլ հակակոռուպցիոն կենտրոնի, Համայնքների ֆինանսիստների միավորման, Իրավունքի զարգացման և պաշտպանության հիմնադրամի և Ժողովրդավարության զարգացման հիմնադրամի կողմից։
