Երևանի Նոր Նորք վարչական շրջանի ղեկավար Տիգրան Տեր-Մարգարյանը և ենթադրաբար թաղապետարանի աշխատակցիները այսօր հարվածել են ակտիվիստ Արթուր Չախոյանին: Նա ավելի վաղ սոցիալական ցանցում գրել էր, որ գնում է թաղապետարան՝ մասնակցելու հանրային քննարկման:
Սակայն, ինչպես երևում է լրատվամիջոցների հրապարակած տեսանյութում, մինչ քննարկում վիճաբանություն է սկսվում, Չախոյանի նկատմամբ բռնություն է գործադրվում:
ՆԳՆ-ից «Ազատությանը» փոխանցեցին, որ ոստիկանության օպերատիվ արձագանքնման խմբերը տեսանյութի հրապարակումից հետո մեկնել են են թաղապետարան: Արթուր Չախոյանը հրավիրվել է ոստիկանության Նոր Նորքի բաժին՝ հաղորդում տալու:
Ձերբակալված անձ այս պահին չկա:
Երևանի քաղաքապետարանից մեկնաբանելով միջադեպը՝ նշել են, որ բռնությունը ցանկացած դրսևորմամբ անընդունելի է։
«Միևնույն ժամանակ, հարկ է նշել, որ հայհոյանքը, վիրավորանքը և անհատի արժանապատվությունը նվաստացնող ցանկացած վարք ևս բռնության ձևեր են և չեն կարող դիտարկվել խոսքի ազատության շրջանակում», — փոխանցել են քաղաքապետարանից։
