Հիվանդանոցում բուժում ստացող Հռոմի պապ Ֆրանցիսկոսն առաջին անգամ կարճ աուդիոուղերձ է հղել հավատացյալներին։
«Ամբողջ սրտով շնորհակալություն եմ հայտնում (Սուրբ Պետրոսի) հրապարակից իմ առողջության համար կատարած աղոթքների համար։ Ես ձեզ հետ եմ այստեղից։ Թող Աստված օրհնի ձեզ, և Աստվածածինը պահպանի ձեզ։ Շնորհակալություն»,- ասել է Հռոմի պապը։
Հռոմի Ֆրանցիսկոս պապի շնորհակալական ուղերձը ձայնագրվել է իսպաներենով, այն հնչել է Վատիկանի Սուրբ Պետրոսի հրապարակում՝ երեկոյան աղոթքի ժամանակ:
Հռոմի պապը Ջեմելի հիվանդանոց է տեղափոխվել երեք շաբաթ առաջ՝ շնչառության հետ կապված խնդիրներով, օրեր անց նրա մոտ երկկողմանի թոքաբորբ է ախտորոշվել:
