ՈւԵՖԱ-ն և կազմակերպության նախագահ Ալեքսանդեր Չեֆերինը որևէ հայտարարություն չեն արել «Ոսկե գնդակ» մրցանակաբաշխության արդյունքների վերաբերյալ, նշված է ՈւԵՖԱ-ի հաղորդագրության մեջ։
«Մենք կտրականապես մերժում ենք ՈւԵՖԱ-ի ենթադրյալ մեկնաբանությունների մասին շրջանառվող պնդումները «Ոսկե գնդակ»-ի հանձնման արդյունքների վերաբերյալ։
Ո՛չ ՈւԵՖԱ-ն, ո՛չ էլ նրա նախագահը որևէ հայտարարություն կամ մեկնաբանություն չեն արել մրցանակաբաշխության արդյունքների վերաբերյալ։ Նմանատիպ ցանկացած հաղորդագրություն լրիվ անհիմն է և չի համապատասխանում իրականությանը։
Մենք իրավունք ենք վերապահում դատական հայց ներկայացնելու ցանկացած կողմի դեմ, որը մասնակցում է այս կեղծ պնդումների տարածմանը», — ասված է ՈւԵՖԱ-ի հայտարարության մեջ, որը հրապարակել է իսպանական Marca պարբերականը։
Մրցանակաբաշխությունից հետո լուրեր էին տարածվել, թե Ալեքսանդեր Չեֆերինը խոսել էր «Ռեալի» մասին՝ նշելով, որ արարողությանը չմասնակցելը շատ բան է ասում մադրիդյան ակումբի մասին։
