Վթարի հետևանքով հիվանդանոց տեղափոխված զորացրված զինծառայողներից երկուսի վիճակը ծանր է

Հայաստանի Հանրապետության քննչական կոմիտեի մամուլի քարտուղար Գոռ Աբրահամյանը մանրամասներ է հայտնել զորացրված զինծառայողներ տեղափոխող ավտոմեքենայի մասնակցությամբ ճանապարհատրանսպորտային պատահարի վերաբերյալլ:

«Հուլիսի 11-ին ժամը 11-00-ի սահմաններում Երևան-Մեղրի ճանապարհի 175 կմ հատվածում՝՝ Գորայք բնակավայրի մոտ, վթարի է ենթարկվել «Միցուբիշի Գրանդիս» մակնիշի քաղաքացիական ավտոմեքենա, ինչի հետևանքով տեղում մահացել են երկու անձ, իսկ 5-ը տարբեր աստիճանի մարմնական վնասվածքներով տեղափոխվել են բուժհաստատություններ։

Նախնական տվյալներով՝ զորացրված զինծառայողները տաքսի ավտոմեքենայով ուղևորվելիս են եղել Երևան քաղաքի ուղղությամբ։

Մահացածներից մեկը վարորդն է, մեկը՝ ուղևորներից մեկը։ Նախնական տվյալներով բուժհաստատություն դիմած անձանցից 2-ի վիճակը ծանր է, երկուսինը՝ միջին ծանրության, մեկինը՝ բավարար»,- «Ֆեյսբուք»-ի իր էջում գրել է Գոռ Աբրահամյանը:

Դեպքի առթիվ ՀՀ քննչական կոմիտեի Սյունիքի քննչական վարչության Սիսիանի քննչական բաժնում նախաձեռնվել է քրեական վարույթ՝ ՀՀ քրեական օրենսգրքի 342-րդ հոդվածի 3-րդ մասի հատկանիշներով։

Քննիչները դեպքի վայրում են, իրականացնում են անհրաժեշտ և անհետաձգելի քննչական գործողություններ։

Ավելի ուշ տեղեկատվություն կհրապարակվի։

Լրահոս

Օրացույց

Հուլիսի 2024
Ե Ե Չ Հ Ու Շ Կ
1234567
891011121314
15161718192021
22232425262728
293031