«Գնահատականն այն է, որ մարող շարժում է: Այսպիսի շարժումներ վերջին մի քանի տարիներին շատ ենք տեսել»:
Այս մասին քաղաքապետարանում՝ լրագրողների հետ զրույցում ասաց Երևանի քաղաքապետի առաջին տեղակալ Արմեն Փամբուխչյանը՝ անդրադառնալով «Տավուշը հանուն հայրենիքի» շարժմանը:
Նրա խոսքով՝ նման եզրահանգման է եկել հաշվի առնելով քաղաքացիների էներգետիկան ու ու շարժման անբովանդակությունը:
«Անբովանդակությունը հրաժարականի պահանջի բովանդակության մեջ է: Եվ ինչպես նշեցի, վերջին 3-4 տարիների ընթացքում պարբերաբար տեսել ենք նման պահանջով մարդկանց հավաքներ, որոնք որ գնացել են դեպի մարման»,- ասաց Փամբուխչյանը:
Վերջինս նաև նկատեց՝ նախ միակողմանի զիջում չկա, բայց ի սկզբանե շարժումը կարծես այլ բնույթ ուներ, բայց հենց հասավ Երևան, դարձավ հրաժարականի պահանջ. «Էապես փոխվեց շարժման բովանդակությունը և հասարակության արձագանքն եղավ այն, որ մեկ հանրահավաքից հետո մարդիկ սկսեցին չգալ»:
Լրագրողի դիտարկմանը, թե իրենք էլ պնդում են, որ օր օրի մարդկանց թիվն ավելանում է Փամբուխչյանն արձագանքեց. «Գիտեք ինչ, իրենք կարող են պնդել, որ 1 միլիոն մարդ է մասնակցում, բայց կան կառույցներ ու ՀԿ-ներ, որոնք ֆիքսում են այն թիվը, որոնք չեն համապատասխանում իրականությանը»:
