Արցախի ժողովրդի կարիքների ապահովման նախաձեռնությունն այսօր՝ մարտի 20-ին, Երևանի Ազատության հրապարակում հանրահավաք է հրավիրել:
Ինչպես ավելի վաղ նշել են կազմակերպիչները՝ հանրահավաքի նպատակն է հիմնովին վերանայել Կառավարության կողմից քննարկվող՝ Արցախի ժողովրդի բնակարանային կարիքների ապահովման ծրագրի նախագիծը, որը չի արտացոլում արցախցիների հավաքական շահերն ու նպատակները։
«Արցախ հավաքական վերադարձի հարցը գերակա համարելով ՝ հանրահավաքի ժամանակ նախատեսվում է քննարկել եւ բարձրաձայնել Արցախի ժողովրդի լայն շրջանակների առաջարկներն ու պահանջները թե՛ վերադարձի և թե՛ բնակարանային ու սոցիալական այլ ծրագրերի վերաբերյալ։ Եթե մտահոգ եք հայ ժողովրդի ու նրա արցախյան հատվածի ճակատագրով ու իրավունքների պաշտպանությամբ, ապա համեցե՛ք հանրահավաքին:
Հանրահավաքի վերջում Նախաձեռնությունը հանդես կգա հայտարարությամբ և առաջարկությունների փաթեթով, որը մշակվել է հանրային լայն քննարկումների արդյունքում և մարտի 6-ի հայտարարության զգալիորեն լրամշակված տարբերակն է։
Արցախի ժողովրդի կարիքների ապահովման նախաձեռնությունը բաղկացած է արցախյան շուրջ 40 կազմակերպություններից, որը որևէ առնչություն չունի քաղաքական ուժերի և ներքաղաքական պայքարի հետ»,-ասվել է հաղորդագրության մեջ:
