Երևան-Սևան ավտոճանապարհին այսօր տեղի ունեցած վթարի հետևանքով տուժած 8 քաղաքացիների առողջական վիճակը բավարար է։ Նրանք անհրաժեշտ բուժօգնությունը ստացել են և այժմ դուրսգրման փուլում են։
Այս մասին Aysor.am-ին հայտնեց ՀՀ առողջապահության նախարարության մամուլի խոսնակ Մարիամ Ծատրյանը։
«Վթարից տուժածների առողջական վիճակը բավարար է, անհրաժեշտ բուժօգնությունը ստացել են, բոլորը դուրսգրման փուլում են»,- ասաց նա։
Հիշեցնենք՝ հոկտեմբերի 8-ին՝ ժամը 07։52-ին, Կոտայքի մարզային օպերատիվ կառավարման կենտրոն ահազանգ է ստացվել, որ Երևան-Սևան ավտոճանապարհին տեղի է ունեցել ՃՏՊ, և անհրաժեշտ է փրկարարների օգնությունը։
ՆԳՆ փրկարար ծառայության փոխանցմամբ՝ Երևան-Սևան ավտոճանապարհի 50-րդ կմ-ին «Mercedes-Benz» մակնիշի միկրոավտոբուսը կողաշրջվել է։
Ըստ նախնական տվյալների՝ վթարի հետևանքով կա 8 տուժած, որոնց կյանքին վտանգ չի սպառնում։
