ԱՄՆ նախագահ Դոնալդ Թրամփը կատակել է, որ քիչ է մնացել աշխատանքից ազատել պետքարտուղար Մարկո Ռուբիոյին Մյունխենի անվտանգության համաժողովում ունեցած ելույթի պատճառով։
«Մարկո, դու հպարտանալու առիթ տվեցիր Մյունխենում։ Իրականում, նա այնքան լավն էր, որ քիչ մնաց աշխատանքից ազատեի նրան, քանի որ նրանք ասում էին. «Ինչո՞ւ Թրամփը չի կարող դա անել»»,- ասել է Թրամփը Վաշինգտոնում անցկացված Խաղաղության խորհրդի առաջին գագաթնաժողովում։
Ամերիկացի առաջնորդը նշել է, որ հարցերի նկատմամբ մեղմ մոտեցումով Ռուբիոն տարբերվում է կաբինետի մեկ այլ անդամից՝ Ջեյմս Դեյվիդ Վենսից։ «Մեր կաբինետը հիանալի թիմ է։ Նրանցից շատերն այստեղ են։ Վենսը պարզապես հիանալի է։ Շատ շնորհակալ եմ։ Երբեմն նա փոքր-ինչ համառ է դառնում։ Երբեմն նրան փոքր-ինչ զսպել է պետք։ Երբեմն նա իր կարծիքն է հայտնում»,- հավելել է Թրամփն՝ ընդգծելով, որ փոխնախագահը պետքարտուղարի «լրիվ հակապատկերն» է։
Մյունխենի 62-րդ համաժողովում Ռուբիոն հայտարարել է, որ աշխարհն առանց սահմանների և ազգային շահերը գլոբալ կարգուկանոնով փոխարինելու գաղափարը սխալ է դուրս եկել։ Նա միաժամանակ ԱՄՆ-Եվրոպա դաշինքին կոչ արեց հարմարվել 21-րդ դարի մարտահրավերներին՝ ընդգծելով Եվրոպայի և Միացյալ Նահանգների միջև համագործակցության ընդհանուր ծագման և հիմնարար պատճառների կարևորությունը։
