Արհեստական բանականությունը կարող է մինչև 2030-2031 թվականները դառնալ մարդկությունից ավելի խելացի, Դավոսում անցկացված Համաշխարհային տնտեսական ֆորումում հայտարարել է ամերիկացի միլիարդատեր և ձեռնարկատեր Իլոն Մասկը: Նա կանխատեսել է, որ աշխարհը կդառնա «միլիարդավոր» մարդանման ռոբոտների տուն, որոնք կարող են հոգալ երեխաների, ծնողների, կենդանիների մասին և մարդկանց համար այլ առաջադրանքներ կատարել: Մասկը կատակով իրեն այլմոլորակային է անվանել:
«Ըստ իս, այս տարվա վերջին կարող է ի հայտ գալ ցանկացած մարդուց ավելի խելացի արհեստական բանականություն, կամ ավելի ստույգ՝ ոչ ուշ, քան հաջորդ տարի: Իսկ 2030-2031 թվականներին, մոտ հինգ տարի անց, արհեստական բանականությունը կլինի ավելի խելացի, քան ամբողջ մարդկությունը միասին վերցրած»,- ասել է նա:
Ձեռնարկատերը նշել է, որ մարդանման ռոբոտները թվաքանակով կգերազանցեն մարդկանց, և յուրաքանչյուրը կկարողանա առնվազն մեկ նման անդրոիդ գնել: Նրանք կօգնեն տնային գործերում, հոգ կտանեն երեխաների մասին և այլ կենսական կարիքներկբավարարեն:
«Մենք պետք է չափազանց զգույշ լինենք ռոբոտաշինության հարցում։ Հո չե՞նք չենք ուզում հայտնվել Ջեյմս Քեմերոնի ֆիլմում… Մենք սիրում ենք նրա ֆիլմերը, բայց ակնհայտորեն չենք ուզում հայտնվել «Տերմինատոր» ֆիլմում»,- զգուշացրել է Մասկը՝ նկատի ունենալով մարդկության դեմ ապստամբող ինքնագիտակցությամբ օժտված արհեստական բանականությունը։
Նա կատակով նշել է նաև, որ «ոչ ոք իրեն չի հավատում», ընդգծելով, որ SpaceX-ի մոտ 9000 արբանյակները երբեք չեն հանդիպել այլմոլորակային տիեզերանավի։
«Կյանքն ու գիտակցությունն աներևակայելիորեն հազվագյուտ երևույթներ են. գուցե մենք միակն ենք ամբողջ տիեզերքում։ Եվ եթե դա ճիշտ է, մենք պետք է անենք ամեն ինչ, որպեսզի գիտակցության լույսը երբեք չմարի»,- եզրափակել է միլիարդատերը։
