Ուկրաինայի դաշնակիցները երեքշաբթի օրը կհանդիպեն Փարիզում՝ ապագա անվտանգության երաշխիքներում իրենց ներդրումը համաձայնեցնելու համար, որոնք Կիևը պետք է ստանա պատերազմի ավարտի դեպքում, հաղորդում է Reuters-ը։
Ուկրաինայի նախագահ Վլադիմիր Զելենսկին կմիանա ավելի քան 27 առաջնորդների, ինչպես նաև ամերիկյան բարձրաստիճան բանակցողներ Սթիվ Ուիթքոֆին և Ջարեդ Քուշներին՝ ուկրաինական, եվրոպական և ամերիկյան ընդհանուր դիրքորոշման մշակման լայնածավալ ջանքերի շրջանակում, որը հետագայում կարող է ներկայացվել Ռուսաստանին։
Բանակցություններն ակտիվացել են նոյեմբերին, սակայն առայժմ քիչ ազդակներ կան, որ Ռուսաստանը պատրաստ է ընդունել ներկայիս առաջարկները, քանի որ տարածքային հարցը մնում է բանակցությունների առանցքային խոչընդոտը, իսկ մարտական գործողությունները չեն հանդարտվում, մեկնաբանում է պարբերականը։
Երեքշաբթի օրը դիվանագետները հայտարարել են, որ Փարիզում գտնվող ռազմական պաշտոնյաները պետք է թղթի վրա ամրագրեն կոնկրետ պարտավորությունները, մինչ այժմ ռազմական խոստումները հիմնականում անորոշ են եղել, նշում է Reuters-ը։
Հրավիրված 35 պատվիրակություններին ուղարկված և պարբերականի կողմից վերանայված հուշագրի համաձայն՝ հանդիպումը կկենտրոնանա բազմազգ ուժերին ներդրումների ապահովման վրա, որն իրականացվելու է հրադադարի դեպքում՝ Ուկրաինայի հետ համակարգված կերպով և ԱՄՆ աջակցությամբ։
Ըստ գործակալության տվյալների հուշագրում առաջարկվում է նաև համաձայնեցնել հետագա քայլերը՝ ուղղված Ուկրաինային աջակցության ուժեղացմանը և Ռուսաստանի վրա ճնշումների մեծացմանը, եթե Մոսկվան հրաժարվի բովանդակային բանակցություններից։
«Մենք համաձայնության ենք եկել անվտանգության երաշխիքների գործառնական մանրամասների շուրջ»,- գագաթնաժողովից առաջ լրագրողներին հայտնել է Ֆրանսիայի ներկայացուցիչը։
Բարձրաստիճան եվրոպացի պաշտոնյան հայտնել է, որ կոալիցիայի կողմից երաշխիքների ամրապնդումը կարող է օգնել հստակեցնել ԱՄՆ-ի պարտավորությունները, որոնք ընդհանուր գծերով շարադրվել են Ուկրաինայի հետ երկկողմ բանակցությունների ընթացքում։
