2025թ. առաջին 11 ամիսներին ավելի քան 97 հազար ռուսաստանցի ստացել է քաղաքացիություն կամ բնակության թույլտվություն այլ երկրներում, ինչը 12 հազարով պակաս է, քան 2024թ․։ Այս մասին ՏԱՍՍ-ին հայտնել է Ռուսաստանի ՆԳՆ մամուլի կենտրոնը՝ գործակալության հարցմանն ի պատասխան։
«2025թ․ առաջին 11 ամիսներին Ռուսաստանի Դաշնության քաղաքացիները ներկայացրել են ավելի քան 97 հազար ծանուցում օտարերկրյա պետության քաղաքացիություն (հպատակություն) ձեռք բերելու կամ բնակության թույլտվություն կամ այլ փաստաթուղթ ստանալու մասին, որը հաստատում է Ռուսաստանի Դաշնության քաղաքացու՝ օտարերկրյա պետությունում մշտական բնակության իրավունքը»,- նշել է մամուլի կենտրոնը։
ՆԳՆ-ում ավելացրել են, որ 2024թ․ առաջին 11 ամիսներին ստացվել է նման 109 հազար ծանուցում։
«Դիտարկվող ժամանակահատվածում Ռուսաստանի Դաշնության քաղաքացիները հիմնականում տեղեկացրել են Գերմանիայում, Իսրայելում, Իսպանիայում, Հայաստանում եւ ԱՄՆ-ում քաղաքացիություն (հպատակություն) ձեռք բերելու եւ բնակության թույլտվություններ ստանալու մասին»,- ավելացրել է նախարարությունը։
Արտասահմանյան երկրում անձնագիր կամ բնակության թույլտվություն ստացած քաղաքացին պարտավոր է տեղեկացնել Ռուսաստանի ներքին գործերի նախարարությանը, հաղորդել է ՏԱՍՍ-ը։
Եթե Ռուսաստանի քաղաքացին անտեսի այս պահանջը, նա կարող է պատասխանատվության ենթարկվել՝ 500-1 000 ռուբլի տուգանքով կամ Ռուսաստանի քրեական օրենսգրքի 330.2 հոդվածով, որը նախատեսում է մինչեւ 200 հազար ռուբլի տուգանք կամ մինչեւ 400 ժամ պարտադիր աշխատանք։
