«Ոսկե գնդակի» հնգակի դափնեկիր Կրիշտիանու Ռոնալդուն Պիրս Մորգանի հետ հարցազրույցում ասել է, որ շուտով կարող է թոշակի անցնել։
«Պատկերացում ունե՞մ, թե երբ եմ թոշակի անցնելու։ Շուտով։ Բայց կարծում եմ, որ կպատրաստվեմ դրան։ Դժվար կլինի, այո, գուցե լաց լինեմ, դա նորմալ է։ Ես չեմ ամաչում դրանից. ես բաց մարդ եմ», — ասել է Ռոնալդուն։
«Կարծում եմ, որ կարող եմ հաղթահարել այս ճնշումը։ Կա՞ արդյոք ինչ-որ բան, որը կարող է փոխարինել ֆուտբոլին ինձ համար։ Ոչ։ Բայց ես ավելի շատ ժամանակ կունենամ ինձ, ընտանիքիս և երեխաներիս համար», — հավելել է նա։
40-ամյա Ռոնալդուն Չեմպիոնների լիգայի հնգակի հաղթող է, Եվրոպայի չեմպիոն և իր ազգային հավաքականի բոլոր ժամանակների լավագույն ռմբարկուն։ Իր կարիերայի ընթացքում նա խաղացել է «Սպորտինգ»-ում, «Մանչեսթեր Յունայթեդ»-ում, «Ռեալ Մադրիդ»-ում, «Յուվենտուս»-ում, իսկ 2022 թվականից խաղում է Սաուդյան Արաբիայի «Ալ-Նասր» ակումբում։
