Լրատվամիջոցներից մեկը ուսումնասիրել է բաց աղբյուրներում հրապարակված փաստաղթերն ու անդրադարձել ՀՀ ներքին գործերի նախարարության հոկտեմբեր ամսվա ընթացքում կատարած գնումներին։
Հրապարակման մեջ ասվում է, որ ՀՀ ներքին գործերի նախարարությունը հոկտեմբերին պետբյուջեի հաշվին գնել է միջադիրներ, ալկոհոլային խմիչքներ, չրերի տեսականի։
Հարցի առնչությամբ «Հայկական ժամանակ»-ը դիմել է ՆԳ նախարարություն:
ՆԳ մամուլի քարտուղար Նարեկ Սարգսյանը մեզ հետ զրույցուն ասել է. «Առանց ՆԳՆ-ից պարզաբանում պահանջելու հրապարակվել է ապրանքների ցանկ, որոնց որոշ մասը նախատեսված է արարողակարգային միջոցառումների համար, ինչը նորություն չէ, և նմանատիպ գնումների մասին տեղեկատվություն կարելի է գտնել պետական բոլոր մարմինների բաց հարթակներում»:
Ինչ վերաբերում է հիգիենայի որոշ պարագաներին, ապա ըստ Սարգսյանի՝ դրանք ձերբակալված անձանց պահելու վայրերում՝ ազատությունից զրկված կանանց համար են, ինչը նախատեսված է ՀՀ կառավարության 2008 թ․ թիվ 574-Ն որոշմամբ։
«Տարակուսելի է, որ այս տեղեկությունը հայտնի չի եղել լրագրողին, և հատկապես խմբագրին, որն իրավական ոլորտում աշխատանքի երկարամյա փորձ ունի։ Բացի այդ, մեր կողմից կապ է հաստատվել նշված լրատվամիջոցի հետ, ներկայացվել պարզաբանում, ինչպես նաև առաջարկություն՝ շտկել նյութում ներկայացված մանիպուլացիոն հատվածները։ Լրատվական մյուս կայքերում տարածում գտնելուց հետո նշված կայքը ՆԳՆ-ի կողմից Հ․Գ․ կարգով ավելացրել է մեկ նախադասություն, սակայն մանիպուլացնող մյուս հատվածները մնացել են նույնը»,- ասել է մամուլի քարտուղարը:
ՆԳՆ-ից կոչ են անում մանիպուլացիաների չդիմել և հրապարակել ճշտված տեղեկատվություն. «Եթե կան թյուրընկալումներ, նախքան հոդվածի հրապարակումը ճշտումներ անել ՆԳՆ հանրային հաղորդակցության և իրազեկման վարչությունից (ինչպես մնացած այլ իրավիճակներում անում են նույն կայքի լրագրողները)»:
