Միացյալ Նահանգները կսպանի այն մարդկանց, ովքեր Վենեսուելայից թմրանյութեր են մաքսանենգ ճանապարհով ներմուծում երկիր, հայտարարել է ԱՄՆ նախագահ Դոնալդ Թրամփը հոկտեմբերի 23-ին Սպիտակ տանը կայացած մամուլի ասուլիսում:
Լրագրողի հարցին, թե արդյոք նա կխնդրի՞ Կոնգրեսի թույլտվությունը Վենեսուելայի դեմ պատերազմի համար, Թրամփը պատասխանել է. «Ես չեմ կարծում, որ մենք անպայման պատերազմ հայտարարելու խնդրանքով ենք դիմելու: Ես կարծում եմ, որ մենք պարզապես սպանելու ենք այն մարդկանց, ովքեր թմրանյութեր են մաքսանենգ ճանապարհով ներմուծում մեր երկիր»:
Նա ընդգծել է, որ Վաշինգտոնը շատ դժգոհ է լատինաամերիկյան երկրից:
«Գիտեք, հաջորդը ցամաքն է», — ասել է նա:
Միևնույն ժամանակ, Սպիտակ տան ղեկավարը կեղծ է որակել The Wall Street Journal-ի նույն օրը հրապարակված հաղորդագրությունն այն մասին, որ ամերիկյան B-1 ռմբակոծիչները թռել են Վենեսուելայի սահմանի մոտ: Հրատարակությունը գրել է, որ թռիչքների հետևման տվյալները հաստատել են դա:
Հիշեցնենք, որ սեպտեմբերի սկզբից ի վեր ամերիկյան ռազմանավերը բազմիցս հարվածել են միջազգային ջրերում գտնվող նավերին, որոնք, ըստ ԱՄՆ-ի, կապված են վենեսուելական թմրավաճառական կարտելների հետ։
Վենեսուելայի նախագահ Նիկոլաս Մադուրոն Կարիբյան ավազանում նավերի վրա ԱՄՆ ռազմական հարձակումները անվանել է հարյուրավոր տարիների ընթացքում Լատինական Ամերիկայի համար ամենալուրջ սպառնալիքը, մինչդեռ պաշտպանության նախարար Վլադիմիր Պադրինո Լոպեսը դա անվանել է չհայտարարված պատերազմ, որի արդյունքում մարդիկ մահապատժի են ենթարկվել՝ անկախ նրանից, թե նրանք թմրանյութերի առևտրով զբաղվողներ էին, թե ոչ։
