Եվրահանձնաժողովը ցանկանում է պարտավորեցնել անդամ պետություններին իրականացնել կենսաթոշակային բարեփոխումներ: Եթե նրա առաջարկությունները չիրականացվեն, ազգային կառավարությունները չեն կարողանա լիովին հավակնել Բրյուսելի բյուջետային ֆինանսավորմանը, հաղորդել է Politico-ն՝ հղում կատարելով աղբյուրներին։
Եվրահանձնաժողովը պատրաստում է ԵՄ նոր բյուջե 2028-2034թթ. համար, որը կարող է հասնել 2 տրիլիոն եվրոյի: Բրյուսելը պարբերաբար օգտագործում է բյուջետային հատկացումներ անդամ պետություններում որոշակի բարեփոխումներ խթանելու համար, եւ այդ նպատակով Եվրահանձնաժողովը մշակում է անհատական առաջարկություններ կոնկրետ երկրների համար՝ անհրաժեշտության դեպքում:
Politico-ի տվյալներով՝ այս անգամ առաջարկությունները կարող են ուղղված լինել ազգային կենսաթոշակային համակարգերին, որոնք, ծերացող բնակչության եւ ցածր ծնելիության պատճառով, «կաթվածահար» լինելու վտանգի տակ են որոշ ազգային կառավարությունների բարձր պարտքի պատճառով: «Եվրահանձնաժողովի աշխատանքն այն է, որ օգնի այս դժվարին գործի կատարմանը: Անհատական հատուկ առաջարկությունների գործիքը երկրների համար հարմար է այդ նպատակին»,- պարբերականին ասել է Եվրահանձնաժողովի բարձրաստիճան պաշտոնյան։
2023թ․ տվյալները մեջբերելով՝ պարբերականը նշել է, որ ԵՄ-ում կենսաթոշակառուների 80 տոկոսը կախված է բացառապես պետական կենսաթոշակներից: Արդյունքում՝ 65 տարեկանից բարձր ԵՄ յուրաքանչյուր հինգերորդ բնակիչ (18.5 միլիոն մարդ) աղքատության շեմին է: Եվրահանձնաժողովը չի սահմանի կենսաթոշակների վճարման չափեր կամ թոշակի անցնելու տարիք, բայց ցանկանում է, որ անդամ պետությունները ստեղծեն ԱՄՆ-ի նման լայնածավալ մասնավոր կենսաթոշակային խնայողական համակարգեր:
