Երևանի փոխքաղաքապետ Արմեն Փամբուխչյանը «Ֆեյսբուք»-ի էջում հայտնել է, որ Շենգավիթ վարչական շրջանում աշխատակազմին է ներկայացրել նորանշանակ ղեկավար Տիգրան Գաբրիելյանին:
«Հաջողություններ մաղթելով պատասխանատու աշխատանքում՝ կարևորեցի վարչական շրջանների դերը ի հայտ եկող խնդիրների արագ արձագանքման և բնակիչների հետ մշտական կապի ապահովման գործում։
Շնորհակալություն հայտնեցի նաև նախկին ղեկավար Ռազմիկ Մկրտչյանին՝ համատեղ արդյունավետ և հաջողված աշխատանքի համար»,- գրել է նա։
Ավելի վաղ հայտնել էինք, որ Շենգավիթ վարչական շրջանի նախկին ղեկավար Ռազմիկ Մկրտչյանի խափանման միջոցը փոխվել է վարչական հսկողությամբ և երկրից բացակայելու արգելքի:
Վերջինս «Ֆեյսբուք»-ի իր էջում հայտնել է, որ դուրս է գալիս «Քաղաքացիական պայմանագիր» կուսակցությունից:
Հիշեցնենք՝ հունիսի 10-ին Ռազմիկ Մկրտչյանը հայտարարել էր իր լիազորությունները դադարեցնելու մասին:
Հունիսի 14-ին Ռազմիկ Մկրտչյանը կալանավորվել էր:
