«Հայաստանը որոշումները կայացնում է բացառապես ներքին օրենսդրության շրջանակներում և խորհրդատվության կարիք չունի, հատկապես հարևան երկրների կողմից»:
Այս մասին լրագրողների հետ զրույցում ասել է «Քաղաքացիական պայմանագիր» խմբակցության պատգամավոր Լուսինե Բադալյանը։
«Կարծում եմ, որ դավադրության տեսությունները խանգարում են առաջընթացին, ժամանակն է հեռանալ դրանից»,- նկատել է նա։
Վերջինս քննադատել է այն տպավորություն ստեղծելու փորձը, թե Հայաստանի իշխանությունները ամեն ինչ անում են Ադրբեջանի ցուցումով։ Նա դատարկ խոսակցություններ է անվանել այն կարծիքները, թե Հայաստանում սահմանադրական փոփոխությունները նախաձեռնվել են Ադրբեջանի պահանջով։
Պատգամավորը վստահեցրել է, որ եթե մեկը Հայաստանում հանցագործություն է կատարում, նրա դիրքը չպետք է օգտագործվի որպես մեղմացնող հանգամանք։ Բադալյանը վստահություն է հայտնել, որ Հայաստանում բոլոր քաղաքացիները հավասար են՝ անկախ նրանից՝ բարձրաստիճան պաշտոնյաներ են, հոգևորականներ, թե սովորական մարդիկ. «Միքայել Աջապահյանի հասցեին մեղադրանքներն աբսուրդ չեն, նա ինքն է խոստովանել, որ բազմիցս Հայաստանում ռազմական հեղաշրջում իրականացնելու կոչեր է արել»:
Ինչ վերաբերում է այն հայտարարություններին, թե «պետք է պատին ծեփել», ապա, ըստ նրա, դրա մասին պետք էր խոսել դեռևս 2018 թվականին, երբ դրանք հնչում էին, և ոչ թե հիմա, քանի որ պատերազմից հետո իրականությունները փոխվել են. «Պատերազմից հետո մեր առջև ծառացած են այլ մարտահրավերներ, որոնք մենք պարտավոր ենք փոխել»:
Նրա խոսքով՝ հոգևորականները ոչնչով չեն խանգարում, եթե զբաղվում են իրենց գործով. «Սակայն, երբ հոգևորականը քաղաքականությամբ է զբաղվում, նա ավտոմատաբար համարվում է քաղաքական գործիչ և կրում է նույն պատասխանատվությունը, ինչ մյուս քաղաքական գործիչները։ Քաղաքական գործունեության մեջ հոգևորականի կարգավիճակը որևէ առավելություն չի տալիս»։
Միևնույն ժամանակ, ըստ Բադալյանի՝ եկեղեցին իրավունք չունի դիրքորոշում հայտնել քաղաքական հարցերի վերաբերյալ. «Երբեք խոսակցություն չի եղել այն մասին, որ Նիկոլ Փաշինյանը ցանկանում է փոխել Ամենայն հայոց կաթողիկոսին, նա անձամբ դա անելու լիազորություններ չունի»:
Վերջինս հավելել է, որ քրիստոնյան չի կարող դեմ լինել խաղաղությանը։
«Շատ ավելի ազնիվ կլիներ, որ նրանք հագուստները փոխեին և զբաղվեին քաղաքականությամբ։ Իսկ եթե նրանք շարունակում են մնալ հոգևորական և դրա քողի ներքո երկրի ներսում դավեր են նյութում, ապա պետք է պատժվեն օրենքի ողջ խստությամբ»,- ընդգծել է պատգամավորը։
Նա վստահեցրել է, որ իշխանությունները քայլեր են ձեռնարկում ադրբեջանական զորքերը Հայաստանի ինքնիշխան տարածքներից դուրս բերելու համար. «Այս ընթացքում կորոշվեն ժամկետները և այն տարածքի քարտեզները, որտեղից նրանք պետք է լքեն մեր տարածքները, իսկ մենք՝ նրանցը: Նման համաձայնագրեր գոյություն ունեն»:
