ԱՄՆ-ի կողմից մաքսատուրքերի բարձրացումը մինչ այժմ ավելի քիչ ազդեցություն է ունեցել համաշխարհային մակարդակի վրա, քան սպասվում էր, սակայն «վաղաժամ և սխալ» կլիներ եզրակացնել, որ դրանք ազդեցություն չեն ունեցել տնտեսական աճի վրա, երեքշաբթի օրը հայտարարել է Արժույթի միջազգային հիմնադրամը, փոխանցում է CNN-ը։
Արժույթի միջազգային հիմնադրամը (ԱՄՀ) իր վերջին «Համաշխարհային տնտեսական հեռանկարներ» զեկույցում փոքր-ինչ բարձրացրել է այս տարվա համաշխարհային և ԱՄՆ տնտեսական աճի վերաբերյալ իր սպասումները՝ նաև նշելով ԱՄՆ մաքսատուրքերի սպասվածից փոքր ինչ ավել բարձրացումները։
Ըստ Վաշինգտոնում գործող ինստիտուտի տվյալների՝ առևտրային հայտարարությունների հոսքը, ներառյալ Միացյալ Նահանգների և մի քանի առևտրային գործընկերների միջև գործարքները, հանգեցրել են ԱՄՆ-ի միջին սակագնային դրույքաչափի նվազմանը՝ ապրիլյան առավելագույն ցուցանիշներից մինչև 10-20%՝ երկրների մեծամասնության համար։
ԱՄՀ-ն ակնկալում է, որ համաշխարհային տնտեսությունը 2025 թվականին կաճի 3,2%-ով, ինչը գերազանցում է հուլիսյան 3% կանխատեսումը, բայց «զգալիորեն ցածր է մինչհամաճարակային միջին ցուցանիշից, որը կազմում էր 3,7%»։
Միևնույն ժամանակ, ակնկալվում է, որ ԱՄՆ-ի տնտեսությունն այս տարի կաճի 2%-ով և 2,1%-ով 2026 թվականին, ինչը մի փոքր բարձր է հիմնադրամի հուլիսյան կանխատեսումներից։ «Միացյալ Նահանգները առևտրային համաձայնագրեր էր կնքում տարբեր երկրների հետ և բազմաթիվ արտոնություններ էր տրամադրում»,- իր բլոգում գրել է ԱՄՀ-ի գլխավոր տնտեսագետ Պիեռ-Օլիվիե Գուրինչասը՝ հավելելով, որ երկրների մեծ մասը նույնպես ձեռնպահ է մնացել ամերիկյան ապրանքների մաքսատուրքերը բարձրացնելու միջոցով պատասխան գործողություններից։
Գործարարները նույնպես արագ են հարմարվել՝ ավելացնելով ներմուծումը, սպասելով սակագների բարձրացմանը և վերաուղղորդելով իրենց մատակարարման շղթաները: Այնուամենայնիվ, նա նշել է, որ առևտրային լարվածությունը շարունակում է սրվել, չկա որևէ երաշխիք, որ առևտրային համաձայնագրերը երկար կտևեն և ԱՄՆ ներմուծողները դեռևս կարող են սակագների բարձրացման ծախսերը փոխանցել սպառողներին:
