ՀՀ կրթության, գիտության, մշակույթի և սպորտի նախարարության նախաձեռնությամբ այս տարի գրքի փառատոնն ընդլայնել է աշխարհագրությունը՝ այցելելով մարզեր. հոկտեմբերի 4-ին փառատոնը գնում է Կապան:
Փառատոնի բացման արարողությունը տեղի կունենա ժամը 12:00-ին Կապանի մշակույթի կենտրոնում։ Մեկնարկը կտրվի «Կապան» պատկերագրքի շնորհանդեսով։
Փառատոնի շրջանակում տեղի կունենան գրքի շնորհանդեսներ, քննարկումներ, պոեզիայի ընթերցումներ, ստենդափ, «Լավ էլի» խմբի համերգը։
Կեսօրից մինչև ժամը 20։00-ը կգործի գրքի ցուցահանդես-տոնավաճառ, որին կմասնակցեն 15-ից ավելի հրատարակչություններ, գրախանութներ՝ իրենց հրատարակություններն առաջարկելով 20–50% զեղչով։
Բոլոր միջոցառումների մուտքն ազատ է։
Գրքի երևանյան փառատոնի Կապան այցն իրականացվում է ԿԳՄՍ նախարարության նախաձեռնությամբ, հովանավորը Երևանի քաղաքապետարանն է, աջակիցը՝ Կապանի համայնքապետարանը։ Փառատոնն իրականացնում են Եղիշե Չարենցի անվան գրականության և արվեստի թանգարանը և «Գրքի փառատոն» կրթամշակութային հասարակական կազմակերպությունը։
Կապանում անցկացվելիք միջոցառումների ծրագիրը
12:00-20:00 Գրքի ցուցահանդես-տոնավաճառ 20-50% զեղչով
12:00 «Կապան» գրքի շնորհանդես․ բացման ելույթներ
12:30 Պոետիկ փոթորիկ․ Հասմիկ Սիմոնյան, Եր Կար, Անուշ Քոչարյան, Անի Տոնոյան
14:00 «Ոչ մի շաբաթ առանց գրականության». ինչպե՞ս դասավանդել գրականություն. Հայկ Համբարձումյան
14:00 Մարկ Տվենի «Թոմ Սոյերի արկածներ» գրքի քննարկում «Տարբեր» ակումբի հետ. Վահագն Գասպարյան (6-12 տարեկանների համար). Զանգակ
15:00 Մհեր Արշակյանի «Ուրիշի օրագրեր» գրքի շնորհանդես. Անտարես
16:00 «Զուգահեռ ընթերցումներ» Հայկ Համբարձումյանի և Արքմենիկ Նիկողոսյանի հետ
17:00 ՍանձԱրձակ․ հանդիպում արձակագիրներ Համլետ Առաքելյանի և Հովիկ Աֆյանի հետ
18։00 Ստենդափ․ Արմեն Սարգսյան, Վազգեն Օհանյան, Տիգրան Գևորգյան
19:00 Համերգ․ «Լավ էլի»
Հավելենք, որ սեպտեմբերի 5-7-ը տեղի ունեցած Գրքի երևանյան միջազգային 8-րդ փառատոնին մասնակցել են 50-ից ավելի հրատարակչություններ, գրախանութներ, թանգարաններ, գրադարաններ, կրթամշակութային հաստատություններ։ Փառատոնն ունեցել է 40 հազարից ավելի այցելու, 18 հազարից ավելի վաճառված գիրք, երեք օրերին տեղի են ունեցել 50-ից ավելի միջոցառումներ:
Սեպտեմբերի 28-ին փառատոնն այցելել է Գյումրի՝ Վ․ Աճեմյանի անվան պետական դրամատիկական թատրոն։ Տեղի են ունեցել Հովհաննես Գրիգորյանի հուշատախտակի բացումը, «Բոլորովին ուրիշ աշուն․ Հովհաննես Գրիգորյան-80» խորագրով հոբելյանական ընթերցումներ, գրքերի շնորհանդեսներ, հանդիպումներ գրողների հետ, քննարկումներ, թատրոնի բակում՝ գրքի ցուցահանդես-տոնավաճառ։
