Մալդիվյան Հանրապետության փոխարտգործնախարար Ահմեդ Շիան վստահ է, որ իր երկիրը կկարողանա հարմարվել կլիմայի փոփոխությանը և ծովի մակարդակի բարձրացման արդյունքում չի վերանա աշխարհի քարտեզից: Նման կարծիք է հայտնել դիվանագետը ՏԱՍՍ-ի թղթակցին։
Նրա խոսքով՝ կանխատեսումներն այն մասին, որ արշիպելագը կարող է անհետանալ 80-100 տարի հետո, արդեն արդիական չեն։
«Հարյուր տոկոսով մենք գոյատևելու ենք։ Մենք արդեն հարմարվում ենք, և աշխարհը տեսնում է, թե ինչ ենք անում շրջակա միջավայրը պաշտպանելու համար: Այս մոտեցումներն այսօր կրկնօրինակվում են շատ երկրներում՝ Կարիբյան ավազանից մինչև Խաղաղ օվկիանոս»,- նշել է Շիանը։
«Ես չեմ հավատում, որ Մալդիվները կջնջվեն երկրի երեսից կլիմայի փոփոխության պատճառով, քանի որ մենք հավատում ենք ինքներս մեզ։ Մենք մեր կղզիներում գոյատևել ենք ավելի քան 2 հազար տարի, և ես պատճառ չեմ տեսնում, թե ինչու դրանք չպետք է գոյություն ունենան նույնքան: Մարդիկ շատ դիմացկուն են մարտահրավերներին»,-ասել է նա:
