ԱՄՆ նախագահ Դոնալդ Թրամփը զանգահարել է Իսրայելի վարչապետ Բենիամին Նեթանյահուին՝ քննարկելու Գազայի միակ կաթոլիկ եկեղեցուն Իսրայելի հասցրած հարվածը:
«Դա դրական արձագանք չէր։ Նա այսօր առավոտյան զանգահարել է վարչապետ Նեթանյահուին՝ քննարկելու Գազայի եկեղեցու վրա հարվածները», — լրագրողներին ասել է Լևիթը։
«Իսրայելցիների կողմից կաթոլիկ եկեղեցուն հարվածելը սխալ էր։ Ահա թե ինչ է վարչապետը փոխանցել նախագահին», — հավելել է Սպիտակ տան խոսնակը։
The Times of Israel-ի տեղեկացմամբ՝ Իսրայելի վարչապետ Բենիամին Նեթանյահուի գրասենյակը հուլիսի 17-ի ուշ երեկոյան հայտարարություն է տարածել, որում իր ափսոսանքն է հայտնել Գազայի միակ կաթոլիկ եկեղեցուն Իսրայելի պաշտպանության բանակի հասցրած հարվածի հետևանքով երեք խաղաղ բնակչի զոհվելու կապակցությամբ։
«Իսրայելը խորապես ցավում է, որ Գազայի Սուրբ Ընտանիք եկեղեցուն հարվածել է պատահական արկ։ Յուրաքանչյուր անմեղ կյանքի կորուստը ողբերգություն է։ Մենք կիսում ենք ընտանիքների և հավատացյալների վիշտը», — նշվել է հայտարարության մեջ։
Հայտարարության մեջ նաև շնորհակալական խոսքեր են ուղղվել Հռոմի պապ Լևոն XIV-ին՝ վերջինիս «մխիթարական խոսքերի» համար։
Ավելի վաղ Հռոմի պապը հայտարարություն էր տարածել, որում իր ափսոսանքն էր հայտնել Գազայի վրա կատարված հարվածի ժամանակ մարդկային կորուստների համար և վերահաստատել հրադադարի հույսը՝ միաժամանակ խուսափելով Իսրայելին ուղղակիորեն դատապարտելուց։
Գազայի հատվածի միակ կաթոլիկ եկեղեցու վրա հարձակման հետևանքով զոհվել է երեք մարդ, վիրավորվել՝ ևս ինը։
Իսրայելի բանակը միջադեպից հետո հայտարարել էր, որ հետաքննում են միջադեպը։ Իսրայելի արտաքին գործերի նախարարության տեղեկացմամբ՝ հետաքննության արդյունքները կհրապարակվեն։
