Նոր Նորք վարչական շրջանի Սուրբ Սարգիս եկեղեցու և Դավիթ Բեկի փողոցի միջնամասում կառուցվել է կասկադային համալիր՝ 224 աստիճանահարթակներով և հավելյալ 15 աստիճանահարթակ մուտքի հատվածում: Կառուցվել է խաղահրապարակ երեխաների համար, առանձնացվել է շների համար նախատեսված տարածք: Այգում անցկացվել են ոռոգման համակարգ և արտաքին լուսավորության ցանց: Այդ մասին զեկուցվեց այսօր՝ մայիսի 5-ին, Երևանի քաղաքապետարանի գործակարգավարական խորհրդակցության ժամանակ:
Երևանի քաղաքապետ Տիգրան Ավինյանն արձագանքեց՝ Երևանի քաղաքապետարանը շինբարեկարգման ոլորտում իր աշխատանքները բազմապատկել է նախորդ ժամանակաշրջանների համեմատությամբ, և նմանատիպ բարեկարգման աշխատանքները դարձել են սովորական:
«Ստացել ենք հետաքրքիր նոր միջավայր, նոր կասկադ Նոր Նորք վարչական շրջանում: Իրականացրել ենք նաև 6-7 հեկտար տարածքի վրա ծառատունկ»,- ասաց Ավինյանը և հույս հայտնեց, որ Նոր Նորք վարչական շրջանի բնակիչները հաճախ կգնան բարեկարգված տարածք:
Անդրադառնալով աշխատանքներին, որոնք կատարվում են, բայց որոնց մասին հաճախ չեն խոսվում, Ավինյանը նկատեց. «Քաղաքապետարանի աշխատանքների եռամյա ծավալը միգուցե համեմատելի է նախորդ 10-15 տարիների ծավալի հետ»:
