«Հայաստանը միայնակ կարողանում է իր շահն առաջ տանել, և դրա ամենամեծ օրինակը սահմանազատման գործընթացն է»:
Այս մասին ԱԺ-ում լրագրողների հետ ճեպազրույցի ժամանակ ասաց էկոնոմիկայի նախարար Գևորգ Պապոյանը:
Նրա խոսքով՝ դրա արդյունքում Հայաստանը ստացավ պետական սահման: Ըստ նախարարի՝ սահմանազատման ու սահմանագծման բանակցություններում անպայման քննարկվելու է Ադրբեջանի կողմից ՀՀ օկուպացված տարածքներից դուրս գալու հարցը։
«Այսօր, վաղը, թե երկու տարի հետո որ փուլում կհասնենք, չեմ կարող ասել, բայց երբ մենք խոսում ենք սահմանազատման մասին, նշանակում է հյուսիս-արևելյան ամենավերևի կետից մինչև հարավ-արևելյան ամենաներքևի կետ, այնուհետև՝ Նախիջևանի ամբողջ սահման-ՀՀ պետական սահման, բոլոր հարցերը պետք է քննարկվեն»,- հավելեց նա։
Վերջինս նկատեց․ «Մենք այս կոնկրետ իրավիճակում հաջողություն ենք արձանագրել, և եթե, օրինակ, այս տրամաբանությունը շարունակվի, պայմանավորվենք ևս մեկ հատված, հետո ևս մեկ հատված սահմանազատվի, կարծում եմ՝ պետք չէ հրաժարվել այս տրամաբանությունից և պետք է այդպես շարժվել առաջ»:
