Չորեքշաբթի տեղի ունեցած 5,9 մագնիտուդ ուժգնությամբ երկրաշարժը վնասել է որոշ շենքեր Թուրքիայի արևելյան Մալաթիա նահանգում, սակայն զոհեր չեն եղել, հայտնել է աղետների և արտակարգ իրավիճակների հետևանքների դեմ պայքարի մարմինը (AFAD):
Երեք շենք մասամբ փլուզվել է, սակայն զոհեր չկան, լրագրողներին հայտնել է Թուրքիայի ներքին գործերի նախարար Ալի Յերլիքայան։
Երկրաշարժը զգացվել է նաև սիրիական Հասաքա, Դեյր էզ Զոր և Հալեպ նահանգներում, հայտնել է Սիրիայի պետական լրատվական գործակալությունը։ AFAD-ի տվյալներով՝ երկրաշարժի էպիկենտրոնը գտնվել է Քալե շրջանում՝ Մալաթիա քաղաքից մոտ 40 կմ դեպի արևելք։
AFAD-ը, ոստիկանությունը և ժանդարմերիան ստուգումներ են իրականացրել ամբողջ տարածաշրջանում, ներառյալ՝ Դիարբեքիր, Շանլըուրֆա, Էլազիգ, Բաթման և Թունջելի նահանգներում, նշել է գործակալությունը։
Երկրաշարժի հետևանքով մոտ 190 մարդ ուղարկվել է վեց նահանգների հիվանդանոցներ, որոնցից 43-ը բժիշկների հսկողության տակ են, ասել է Յերլիքայան։ Եվրոպական միջերկրածովյան սեյսմոլոգիական կենտրոնը հայտնել է, որ երկրաշարժի ուժգնությունը կազմել է 6,1 մագնիտուդ՝ 9 կմ խորության վրա
