ՀՀ արտաքին գործերի փոխնախարար Վահան Կոստանյանը կարծում է, որ Տիգրանաշենի մասին խոսակցությունները սպասարկում են արտաքին տարբեր ուժերի օրակարգեր՝ դեստաբիլիզացնելու Հայաստանը։ Այս մասին նա նշեց այսօր՝ հոկտեմբերի 3-ին, լրագրողների հետ զրույցում:
«ՀՀ ինքնիշխան տարածքից որևէ քառակուսի մետր չի հանձնվել որևէ մեկին: Ինչ վերաբերում է սահմանազատման գործընթացին, այդ գործընթացն իր բնական հունով ընթանալու է»,-ասաց նա:
ԱԳ փոխնախարարն ասաց, որ ՀՀ ինքնիշխանության, տարածքային ամբողջականության, սահմանների անքակտելիության, ինչպես նաև ժողովրդավարության համար Հարավային Կովկասում կայունությունն ու խաղաղությունը շատ կարևոր դեր ունեն։
Հարցին, թե ինչու է հանրությունից թաքցվում Խաղաղության պայմանագրի դրույթները, փոխնախարարն ասաց․ «Գործընթացը թափանցիկ է, մենք մշտապես տեղեկացնում ենք տեղի ունեցող գործընթացների մասին, բոլոր հանդիպումների վերաբերյալ տրվում են համապատասխան մամուլի հաղորդագրություններ»։
