Հայաստանի վարչապետ Նիկոլ Փաշինյանը համոզված է, որ կառավարությունը նաև ներդրումային ծրագրերի շնորհիվ Հայաստանը դուրս է բերել զարգացման նոր ուղեծիր:
Փաշինյանը նման դիրքորոշում հայտնեց կառավարության նիստում՝ կիսվելով նախորդ օրը Վայոց ձորի մարզ և առհասարակ այլ մարզեր կատարած այցերի տպավորություններով:
«Ինձ համար ակնհայտ և ուրախալի է, որ այն ներդրումային պետական ռազմավարությունը, որ մտածել ենք, ճիշտ ու արդարացված է: Ինչքան մարզային այցելությունների շրջանակն ընդլայնվում է, այնքան ավելի եմ համոզվում, որ մենք կարող ենք ասել, որ այդ թվում մեր ներդրումային ծրագրերի շնորհիվ Հայաստանը դուրս ենք բերել տնտեսական և ընդհանրապես զարգացման նոր ուղեծիր»,–ասաց Փաշինյանը:
Վարչապետը կառավարության բոլոր անդամներին, իշխանությունների բոլոր ներկայացուցիչներին շնորհակալություն հայտնեց կատարված և կատարվող աշխատանքի համար՝ չմոռանալով առկա խնդիրները:
Նա մատնանշեց մասնավորապես շինարարության ոլորտում նկատած խնդիրները: «Ուրախալին այն է, որ հիմա՝ ի տարբերություն որոշ ժամանակ առաջվա, արդեն հանդիպում են շինարարական օբյեկտներ, որտեղ կես ժամանոց այցի ընթացքում թերություններ աչքի չեն զարնում»,–ասաց նա:
