Խաղաղության պայմանագրի ստորագրումը հակամարտությունը կարգավորելու համար գործողություն է. դրա նպատակը տարածաշրջանում խաղաղությունն ու կայունությունն է, հետագայում Ադրբեջանի հետ հարաբերությունների կարգավորումը և հարեւանությունը: Այս մասին այսօր ԱԺ-ում լրագրողների հետ զրույցում ասաց ԱԺ րտաքին հարաբերությունների հանձնաժողովի նախագահ, ՔՊ-ական պատգամավոր Սարգիս Խանդանյանը՝ անդրադառնալով հարցին, թե արդյոք խաղաղության պայմանագրով Արցախի հարցը փակվում է:
«Հայաստանը բազմիցս հայտարարել է, որ իր հարեւաններից որեւէ մեկի նկատմամբ տարածքային պահանջներ չունի: «Խաղաղության պայմանագրում» դա եւս ամրագրվում է փոխադարձաբար միմյանց տարածքային ամբողջականությունը ճանաչելու մասին սկզբունքով: Ինչ վերաբերում է հումանիտար հարցերին, դրանք միշտ քննարկման ենթակա են տարբեր մակարդակներում: Մասնավորապես, ԼՂ-ի մեր հայրենակիցներին, դուք տեսնում եք, թե ինչ գործողություններ է ձեռնարկում Հայաստանի կառավարությունը»,- ընդգծեց ՔՊ-ական պատգամավորը:
Անդրադառնալով վարչապետ Փաշինյանի հայտարարությանը, թե իրատեսական չի համարում արցախցիների վերադարձի իրավունքի իրացումն այնպես, ինչպես դա պատկերացնում են Արցախի ղեկավարները, Խանդանյանն ասաց. «Շատ բարդ էր իրավունքների հարցը լուծել տարբեր պատճառներով: Ես եւս կարծում եմ, որ այս պայմաններում իրատեսական չէ արցախցիների վերադարձը: Ես չեմ կարծում, որ մենք հիմա այս պահին կարող ենք քննարկել այդ հարցը, այն էլ հրապարակային: Անվտանգության հարցն է ամենակարեւորը, որը դեռ լուծում չունի: Հայաստանի անվտանգությունն է դեռ շատ վտանգված, եւ այս պայմաններում խաղաղության պայմանագրի կնքումը Հայաստանի համար առաջնահերթություն է»։
